Shillong, ïaïong, 23: Ka Estimates Committee jong ka Meghalaya Legislative Assembly, hapoh ka jingïalam jong u MLA ka Nongpoh Constituency Bah Mayralborn Syiem ka la pdiang sngewbha ïa ki dkhot jong ka Committee on Estimates jong ka Jharkhand Legislative Assembly ha ka sngi Balang ha ka jingïalang kaba la long ha Conference Hall jong ka Assembly Secretariat, Meghalaya Legislative Assembly, Shillong.
Ha ka jingïalang la ïashim bynta lang da ki dkhot jong ka Meghalaya Committee ba kynthup ïa u Bah Renikton Lyngdoh Tongkhar (MLA, Mawkyrwat), Bah Adelbert Nongrum (MLA, North Shillong), Remington Gabil Momin (MLA, Rambrai-Jyrngam), Bah Charles Marngar (MLA, Mawhati), bad ka Miani D Shira (MLA, Ampati). Nalor kine, la ïadonlang ruh u Commissioner & Secretary Bah Andrew Simons, u Additional Secretary Malthus S. Sangma bad ki ophisar na ka Meghalaya Assembly Secretariat bad na ki tnat treikam jong ka Jharkhand Legislative Assembly.
U Bah Mayralborn ha ka jingkren pdiang burom u la ong ba ka jinglong ki lum ki wah ki ïasyriem bha hapdeng ka Meghalaya bad ka Jharkhand bad ong ruh ba kine ki ar tylli ki jylla ki dei kiba la buhai shnong da ki riewlum, katba ka Meghalaya ka dei ka jaka sah jong ki riewlum bad ha Jharkhand ki riewlum ki shong ki sah ha rithor.
Ka kynhun na Jharkhand ka la wan khnang na ka bynta ïasam jingtip sha ka jylla Assam, Meghalaya, Sikkim bad Odisha. Ki dkhot na ka Jharkhand Assembly ki long u Hemlal Murmu (Chairman bad MLA, Litipara), u K.B.S. Mehta, MLA, u Mathura Mahto (MLA, Giridih), bad u Amit Kumar (MLA, Silli).
U Hemlal Murmu u la ïaroh ïa ka jingithiang jong ka jinglong jingman ki jaka bad ki lum ki wah ka jylla Meghalaya da kaba ong, “ngi sngew kumba ngi wan jngoh ïa ka bneng. U la kren ruh halor ka jingpawnam jong ka Sohra, kaba long ka shnong kaba jur slap tam ha ka pyrthei bad ïa ka jingkhuid jingsuba jong ka Mawlynnong ha dewbah Asia, kiba don ha ka jylla Meghalaya.
U la pynpaw ruh ba ka jylla Meghalaya ka lah ban nang kiew shaphrang ban kyntiew ïa ki kam jngohkai pyrthei bad ong ruh ba un sa pynsngew shuh shuh ïa ka kamram jong ka Estimates Committee ha ka National Conference of Committee Chairpersons ka ban sa long ha Mumbai.
U K.B.S. Mehta u la pynpaw ruh ka jingsngewnguh ïa ka jingpdiang burom da ka Meghalaya Committee. U la khot bad wer ruh ïa ki dkhot jong ka Meghalaya Committee ban wan jngoh ïa ka Jharkhand khnang ban pynkhlaiñ ïa ka jingïadei hapdeng kine ki ar tylli ki jylla.
U Mathura Mahto u la ïaroh ïa ka jinglong jingman jong ka suiñ bneng bad batai ruh ba ka jylla ka paw ïa ka dur bashisa jong ka jingsngew, “Saare Jahan Se Achha.” U la ong ba kum kane ka jingïakynduh hapdeng ki nongïalam ka jylla ka donkam bha khnang ban wanrah ïa ka jingïatreilang.
U Amit Kumar u la pynpaw ïa ka jingkiew irat jong ka ïoh ka kot ka jylla Meghalaya lyngba ki kam jngohkai. U la ïaroh ïa kane ka jingïalang kaba don jingmut hapdeng kine ki tylli ki nongmihkhmat jong kine ki ar tylli ki jylla bad khot sngewbha ruh ïa ki dkhot jong ka Meghalaya Committee sha ka jylla Jharkhand.
Ha ka jingïalang la ïakren sani ruh halor kiba bun ki mat, kynthup ïa ki jingeh kiba mih na kaba pyntreikam ïa ki skhim ba ai jingmyntoi ïa ki paidbah.
U Chairman Bah Mayralborn Syiem u la pyntip ruh sha ka kynhun na Jharkhand ïa ki projek ba la wanrah da ka Sorkar Meghalaya kum ka surok, ka koit ka khiah bad ka pule puthi. U la pyntip ruh ïa ka kam jong ka Estimates Committee, kaba ju leit jngoh sha kiba bun ki shnong, ki jingshong bishar kam bad ka jingïalang buddien bad ki tnat treikam ban bishar halor ka jingpyntreikam ïa ki projek bad ki skhim bapher bapher.
Ha ka jingïalang la ïakren ruh halor ka jingïaid shaphrang jong ki lai tylli ki Block Institutes of Teacher Education (BITE) bad ki Residential School, ha kaba la kyntu ba dei ban pyndep noh kham kloi ïa ka Eklavya Model Residential Schools (EMRS) ha Ri-Bhoi bad ha East Garo Hills shwa ban kut u snem 2025.
La ïakren ruh ba ka tnat Public Health Engineering kan pyntreikam khlem sangeh ïa ka skhim Jal Jeevan Mission ha ki shnong khappud.
Ka jingïalang ka la ïakren ruh halor ka jingshna ïa ka Maternal and Child Health (MCH) Hospital ba thymmai ha Nongstoiñ bad Umsning, ïa kiba la buh thong ban pyndep noh shwa jong u snem 2025. Ka Committee ka la mynjur ban pynstet ruh ha kaba kyntiew kyrdan sha ki Civil Hospital, ki Primary Health Centre (PHC), bad ki Community Health Centre (CHC).
Halor ka tnat Community & Rural Development (C&RD) la shem ba 70–80% la lah ban shna ïa ki ophis jong ki Block Development Officer (BDO) ba thymmai bad la kyntu ban pyndep ha ka por kaba biang khnang ba ki C&RD block kin ai jingmyntoi sha ki paidbah.
