Shillong, Nailur, 30: Ban wanrah ïa ka rukom treikam kaba pynsuk lyngba ka Digital, ka Sorkar Meghalaya ka la pyllait paidbah ïa ka e-Cabinet system, khnang ban ym pyndonkam shuh ïa kano kano ka jingthoh ha ka kot sada.
Ha ka jingïakren bad ki lad pathai khubor hadien ka jingïalang ha ka sngi Baar, u Myntri Rangbah ka Jylla Conrad K Sangma u la pynbna ba kane ka rukom treikam kaba thymmai kan pynlah ïa ka Kynhun Myntri ban treikam pura lyngba ka online, kaba pynlong ïa ka rukom shim rai kaba kham suk, kaba shngaiñ, bad kaba ym pyndonkam da ki kot sada kum ha ka por ba la leit noh.
U la ong ba ka e-Cabinet system ka ailad ïa ki Myntri Sorkar ban ïoh bishar bniah ïa ki kot ki sla, ki agenda, bad ki rai ba ladep shim da kaba shu peit online lyngba ki tiar kiba shngaiñ bad kiba la shna kyrpang. Ka system ka ailad ban ïoh peit ïa ki rai jong ka kynhun myntri ba ladep long, ban pynsuk ïa ka jingwad bniah bad ka jingtip katkum ka sobjek.
Ka e-Cabinet system ka pynsuk ïa ka jingmynjur bad shim rai online, ka pynduna ïa ka jingdonkam ban da pynlut por ba khyllie ïa ki jingthoh ha ka kot sada bad ka kyntiew ïa ka jingpynbym donkam shuh ïa ki kot sada.
“Ki agenda na ka bynta ka jingïalang jong ka Kynhun Myntri yn thep ha ka e-Cabinet bad ym tang ba ka jingmynjur kan long online khnang ba ka Kynhun Myntri kan ym pyndonkam shuh ïa ki kot sada bad ngin lah ban pyndep ïa ka kamram da ka kor electronic bad kumba nga la ong baroh ki agenda bad ki kot ki sla suki suki ngin sa don ïa ka jingïalang jong ka kynhun myntri khlem kot sada ha ki por ki ban sa wan,” la ong u Sangma.
U la pynthikna shuh shuh ba ïa kane ka rukom la shna da ki lad jingïada kiba khlaiñ, ban pynthikna ba tang ki Myntri Sorkar ba la ai bor ki lah ban peit ïa ka rynsan ba la buh jingtip bad ïa ki jingthoh ba kongsan.
