Shillong, Jymmang 06: Ka seng Hynñiewtrep Youth Council (HYC) ka la dawa ïa Additional Director General of Forests (Wildlife) & Director, Wildlife Preservation-cum-Member Secretary, Standing Committee ka National Board for Wildlife (NBWL) ba kim dei ban ai jingbit ïa ka Eco-Development Society of Meghalaya (EDSM) ba kan pyntreikam ïa ki kam “eco tourism ha Nongkhyllem Wildlife Sanctuary.
Ha ka shithi ba la phah ha ka sngi baar da u President ka HYC u Bah Roy kupar Synrem la ong, ” Ngi kyntu ïa ka ophis jong phi ban ym shah ban leh ïa kino kino ki kam ban wanrah ki jingkylla ha kaba ïadei bad ki kam jngohkai ha sawdong jong ka Nongkhyllem Wildlife Sanctuary kaba la thmu ban pyntrei da ka Eco Development Society of Meghalaya naba kane kan ktah ïa ka jingdon jong ki mrad, ki sim, bad kiwei pat ki jingthaw ha kane ka jaka.”
Na ka liang ka HYC ka la kyntu ruh ïa ka Eco-Development Society of Meghalaya, Telecommunications Consultants India Limited (TCIL) bad E-Factor Experiences Limited, Delhi ba ka dei ban pynsangeh ïa kano kano ka jingthmu bad kiwei pat ki kam kiba la thmu ban pyndep ha kane ka jaka bad kiwei pat ki projek,” u la bynrap.
U la ong ba ha ka jingïalang jong ka Expert Committee for declaration of Eco-Sensitive Zones ha sawdong jong ka Wildlife Sanctuaries/ National Parks kaba la long ha ka 4 tarik u Naitung, 2016 ha Ministry of Environment, Forest & Climate Change, Indira Paryavaran Bhawan, New Delhi, la shim ïa ka rai ban pyntreikam ïa kane ka jingai jingmut ha kaba ïadei bad ka jingpynbna ïa ka Eco-sensitive Zone ha sawdong jong ka Nongkhyllem Wildlife Sanctuary, Meghalaya.
U Bah Roy u la ïathuh ruh ba ka sorkar jylla lyngba ka Eco-Development Society of Meghalaya ka la pynbna ïa ka Tender na ka bynta ka kam “Eco Tourism Works kaba hapoh bad sawdong jong ka Nongkhyllem Wildlife Sanctuary” hapoh ka jingmang pisa kaba long T. 23.70 klur na ka bynta ban pynbha ïa ki kam jngohkai ha kane ka Wildlife Sanctuary. Ha kane ka jingtyrwa lyngba kane ka projek la ong ba kin don ki jaka sah na ka bynta kiba wan jngohkai, ki glass skywalk bad ki water-sport nalor kiwei pat ki jingtei.
