Shillong, Naiwieng, 28: Ka Constitutional Rights Forum (CRF) ka la kyrpad ïa baroh ki seng saiñ pyrthei ba kin sangeh noh ban ai tiket ïa ki bar jylla na ka bynta ka elekshon ka ban sa long sha ka Garo Hills Autonomous District Council (GHADC), da kaba kdew ïa ki kyndon jong ka Sixth Schedule jong ka Riti Synshar ka ri India.
“..ngi kyrpad ïa phi da ka jingsngewrit ban bthah ïa ka party jong phi ban sangeh noh ban ai tiket ïa ki bym dei ki riewlum na ka bynta ka elekshon GHADC bad ban pyrshah ïa ka jingïashim bynta jong ki ha ka elekshon. Kane kan long katkum ki kyndon jong ka Sixth Schedule bad ka Riti Synshar jong ka ri India bad kan pynthikna ïa ka jingïada ïa ki hok bad ki jingmyntoi jong ki paid riewlum,” la ong ka Forum ha ka jingthoh ba la phah sha ki seng saiñpyrthei ba kynthup ïa ka NPP, TMC, Congress, NCP, UDP bad kiwei kiwei ha ka sngi Palei.
“Ngi sngewkhia ba ka jingailad ïa ki bym dei ki trai muluk ban ïashim bynta ha ki elekshon GHADC kan pynduh ïa ka hok bad ïa ki jingmyntoi jong ki nongshong shnong riewlum,” la bynrap ka Forum.
Ka GHADC ka dei ka shlem treikam kaba kyrpang kaba la thaw na ka bynta ka bha ka miat bad ka roi ka par jong ki riewlum bad ka bor synshar ka dei ban shong ha ka kti jong ki riewlum, ki la kynthoh.
“Ngin ailad ba ha ka elekshon MDC ka ban sa long ha u snem 2026 yn shah ïa ki bym dei ki riewlum ban ïashim bynta,” la maham ka Forum.
Halor ka jingdawa ban don kyrpang ïa ka thup kyrteng ki nongthep vote na ka bynta ka GHADC, ka Forum ka la ong, “ngi la ïoh jingtip ba ki MDC ka Liang Pyrshah, ki sengbhalang bad ki nongshong shnong jong ka rilum Garo ki la dawa ïa ka thup kyrteng jong ki nongthep vote ba kyrpang na ka bynta ka GHADC. Ngi kwah ban pynpaw ba ïa kane ka kyndon la thmu tang na ka bynta ki riewlum, ym na ka bynta ki bym dei ki riewlum, na ka bynta ka jingthaw ïa ka GHADC. Hynrei ki seng saiñ pyrthei ki pyndonkam bakla ïa ka naduh kaba sdang ban ïoh jingmyntoi na ka bynta ka party, da kaba pynjot ïa ka kolshor bad ki riti dustur jong ngi, ïa kiba kiwei pat ki bym dei ki jaitbynriew riewlum kim lah satia ban pdiang. Sngewbha kynmaw ba lada mynjur ïa ka Separate Electoral Roll, ngin dawa ïa ka ST Seat ha la ka jong ka hima, kaba ngi ladep ïoh lypa ïa ka jinglaitluid bad ka bor hapoh ki kyndon jong ka Riti Synshar ka ri India na ka Sorkar Pdeng.”
