Shillong, Jymmang, 23: U nongïalam ka Liang Pyrshah ka Iingdorbar Thawaiñ u Dr. Mukul Sangma ha ka sngi Thohdieng u la byrngem ban pynlong da ka jingïakhih pyrshah ïa ka Sorkar Jylla lada kam weng noh ïa ka rai ban aiti pynïaid ïa ka Tura Medical College sha ki riewshimet.
Da kaba kynthoh ïa ka kum ka rai “pyrshah paidbah”, u Dr. Mukul u la maham ba kan don ka jingktah kaba jur bha hadien habud.
“Nga kyntu ïa ki paidbah ban ïasnohkti lang bad nga ha ka jingïakhih namarba ngan ïakhih bad ngan sa syllok ruh bad ki nongshong shnong bad ngin kyntu ïa ka Sorkar bad lada ka Sorkar kam ai jubab kaba biang ngin hap ban ïakhih”, la ong u Myntri Rangbah barim ha ka jingïakren bad ki lad pathai khubor.
“Katkum ka jingsngewthuh jong nga bad kito ki briew kiba pyrkhat na ka bynta ka lawei kaba skhem na ka bynta ki nongshong shnong jong ka jylla da kaba buh ha ka jingmut ïa ka jingmyntoi jong ki samla bad ki pateng ban wan, ngi dei ban pynbor lang ïa ka Sorkar ban weng noh ïa kane ka rai bad ban ïaid shakhmat ban pyndep ïa ka projek bad ban seng ïa ka Tura Medical College kum ka Goverment Medical College. Ym dei ban
“Wat pynlong Public-Private Patnership (PPP), wat pynlong shimet hynrei buh jingmut shwa ïa ka jingmyntoi na ka bynta kawei jong ki briew jong ngi,” u la bynrap.
U Dr. Mukul u la pynkynmaw ruh ïa ka jingthmu ban buh ïa ka Tura Medical College kum ka kolej sorkar ka ban pynmyntoi ïa ki samla pule jong ka jylla.
U la ong ba ka don ka jingïapher kaba khraw hapdeng ki kam Sorkar bad ki Private Sector.
“Ki riewshimet ki ju shim borabor ïa ka rukom shim wai bad beh kam kaba mut ba kam don ka jingïada ha ka imlang sahlang jong ki nongtrei, kiba trei ha ki Private Sector,” ong u nongïalam ka Liang Pyrshah da kaba bynrap “ym tang ba phi sdang da ka rukom PPP bad hadien kata phin pynkylla ïa ka sha ka Private Sector ba pura. Kumno phi lah ban shim ba kane ka jingthmu kaba sniew kan ym lah ban don ha ka jingmut jong kine ki nongthaw aiñ ha ki snem ban wan. Phi nym tip satia ki jaitbriew kiba kumno ki ban don ha ka bor synshar ha ka Sorkar ha ki snem ban sa wan. Kumta, ïa ka rukom pynlong shimet baroh kawei ïa ka tnad Sorkar yn ïohi kum kaei kaei kaba thikna katba ha ka jingsngew jong nga kam long kaba thikna.”
“Namarkata, sa shisien nga ong ïa kane ka sorkar sngewbha sangeh ban aiti sha ki kynhun shimet, sangeh bad pynkylla noh ïa ka rai,” u la bynrap.
“Nga la ïohi ba ki la pynkhreh ïa ka EOI kiba biang bha khnang ban pynsuk ïa kine ki riewshimet ban ïashim bynta hynrei kine ki dei tang ki jingpynjot ïa ka lawei bad ki ban nang pynkha ïa ki jingeh ha ka jingbym donkam donjam bad ban pynjur shuh shuh ïa kane ka jingeh ka bym lah shuh ban weng,” la maham u Dr. Mukul
Haba kylli, une u Nongïalam ka Liang Pyrshah u la ong ba ka jingmut ka long ban pynthikna ba ki Hospital sorkar ki dei ban kham bha ban ïa ki Hospital shimet bad ki Government Medical College ki dei ban kham bha ban ïa ki Private Medical College.
“Hynrei kan long kaba shyrkhei ïa ka lawei jong ka jylla lada ka Tura Medical College ka shah pynngat ha ka jingbei tyngka jong ki riewshimet la ka long ha kano kano ka rukom la ka dei da ka PPP Mode ne ha kano kano ka dur ban aiti sha ki kynhun shimet,” ula bynrap.
