Shillong, Naitung 29: U Superintendent of Police (SP) ka tnat Anti-Narcotic Task Force (ANTF) u Giri Prasad ha ka sngi baar u la pynmih ïa ka jingmaham ïa ki trai ïing ne trai ki jingdon jingem bad ki trai kali ba kim dei ban ailad ïa ki nongkynti jong ki ban pyndonkam na ka bynta ban khaïi drok bad ki kam ba ïadei bad u drok.
Katkum ka jingong jong u, katkum ka kyndon 25 jong ka NDPS Act, ka jingailad ïa ki jaka ne ki kali ban khaïi drok ka dei ka kam runar kaba lah ban shah pynshitom, kaba la shah kheiñ beaiñ bad ka kit ïa kajuh ka jingpynsajia kum ka kam khaïi drok.
Halor kane na ka liang u SP u la kyntu ïa ki trai jaka bad ki trai kali ba ki dei ban pyntip mardor sha ki pulit ne sha ka tnat ANTF lada don ka jingsuba ba don kino kino ba ki ishankhmat kiba thmu ban leh ïa ki kam ba ktah ïa ka imlang sahlang.
U la ong, “Kumta baroh ki trai ïing bad ki trai kali kiba ai wai ïa ka ïing ne ka kali, sngewbha ban pyntip sha ka tnat pulit lane sha ka ANTF lada don ka jingsuba ba ïa ka ïing ne kali jong phi la pyndonkam na ka bynta ka jingthmu ban khaïi drok ne kino kino ki kam kiba ïadei bad u drok kiba lah ban shah pynshitom katkum ka aiñ NDPS Act, 1985.”
