Shillong, Jymmang, 29: Ka Myntri ka Sorkar Jylla kaba khmih ïa ka tnat ka Koit ka Khiah ka Dr. Ampareen Lyngdoh ha ka sngi Palei ka la ïai ban ba ka jingpynïasoh ïa u Aadhaar ka dei beit ka rai shimet jong ki paidbah nongshong shnong.
Ha ka jingïakren bad ki lad pathai khubor, ka Dr. Ampareen ka la ïathuh ba ki ophis jong ki Deputy Commissioner bad ki Block ki ju ïarap ïa ki paidbah ban pynïasoh ïa u Aadhaar bad ka Meghalaya Health Insurance Scheme (MHIS) Card.
Ka la ong ba ka tnat ka ju ïai shong pyrkhat ïa kane ka kam lada jia ba wan lynshop kano kano ka jingjia ba kyrkieh ha kaba ka longing ka bym pat rejistar bad haba iwei na ki dkhot jong ka iing i shitom jur bad kum kata ka khep ban pynïasoh kyrkieh ïa u Aadhaar kan long kaba eh namarba ka por ban pynïasoh ïa u Aadhaar kan shimpor la kumno kumno hynriew bnai.
“Da kaba ong kumta, ngi ju ïai shong pyrkhat ïa kane ka kam na kawei ka jingjia sha kawei pat ka jingjia. Haba mih kino kino ki jingjia ba kyrkieh ngi hap ban pynthkkna ba ngi dei ban ïoh jingïarap na ka ophis Deputy Commissioner, na ki ophis Block bad ngi ju ïarap ruh ban pynïasoh ïa u Aadhar bad ka MHIS Card haba ki wan jia kum kine ki jingjia ba donkam kyrkieh,” la pyntip ka Myntri.
“Hynrei katkum ki jingeh ba ngi la mad ha ki ar snem ba ladep lah ban weng bad kam da long than kaba eh ha kum kane ka por bad ka juk ban pynïasoh ïa u Aadhaar bad ka MHIS jong phi hynrei lait noh sa tang lada phim pat don ïa ka Aadhaar Card. Ki don ki jingkylla bad na kata ka daw ngi ïai kyntu ïa ki paidbah sngewbha ban rejistar ïa u Aadhaar kham kloi katba lah khnang haba mih kino kino ki jingjia ba kyrkieh phi la don lypa ïa ka Aadhaar Card bad ban shu pynïasoh beit bad ka MHIS watla hateng hateng kin don ki jyrwit jyrwat hangne hangne ïa kaba yn dup lah ban pynbeit,” ka la bynrap.
