Shillong, K’lyngkot, 03: Wat ka jingïap ruh kam lah satia ban pynïakhlad ïa ki arngut ki shijur kiba ïa ieid thep mynsiem naduh ka sngi kaba ki la seng ïa u tnum u tyndai tad haduh ka khyllipmat ba kin da khladnoh na kane ka sla pyrthei.
Kine ki shijur ki dei i Bah Donbor Kharkongor iba la 72 snem ka rta ïa iba ju khot ieid i Paheh bad i Kong Dipsy Shabong iba la 82 snem ka rta ba ju khot ieid i Meiheh kiba la khlad lang ha kajuh ka sngi, kata, ha ka 1 tarik Kyllalyngkot 2026 kaba ïapher tang 6 kynta tam eiei.
Ka Khunruid ka Kong Mondalin Shabong ha ka jingïakren bad ka Batesi TV ka la ïathuh ba i Paheh i la khladnoh shwa ha ka por 12:30 baje mynstep bad sa i Meiheh i la khladnoh ha ka por kumba 7 baje janmiet.
Ka la ïathuh ba kine ki shijur watla kim don khun hynrei ka jingïaieid jong ki ka la tehsong ban ïashong ïasah ryngkat mynta la kumba 49 lane 50 snem ha ka shnong Mawlai Kynton Massar ha Block-A hadien ba ki la kynriah noh na Laban bad nalor kata ki la sumar sukher mar kylliang haba ki don hapdeng ka pang ka shitom wat haba ki la noh ka rta ryngkat ka jingsynran lang ki bahaing hasem.
Ïa ka met jong kine ki shijur la tep donburom ha ka Sngi Saitjaiñ ha u lum jingtep jong ka Balang Presbyterian Mawlai Kynton Massar ha Mawlai Mawroh.
Ha shwa ka jingleit ontep, la pynlong ïa ka jinglehniam ha phyllaw ka iingsah ha Mawlai Kynton Massar Block-A ba la pynïaid da ka Balang Presbyterian bad la ai jingkren ruh na ki bahaiing hasem kiba la pyrto ïa ka jingïaieid thep mynsiem jong kine ki shijur.
