Shillong, Risaw, 10: Da ki spah ngut ki paidbah ka shnong Nongrah bad na kylleng ki shnong ba marjan ka sor Shillong kiba dap da ka jingsngewkhia ka mynsiem ki la leit sngewlem bad leit ontep ïa ka met ba dang sah jong u heprit Kyrshanbor Kharmudai ha ka dong Lum Myrboh, Nongrah.
La sakhi ba wat ka mariang ruh ka dum lyoh ban pynpaw ïa ka jingsngewsih halor ka jingshah pynïap u heprit Kyrshanbor. Ka Dong Lum Myrboh ka la khang shnong ha kane ka sngi bad teh ruh da ki lama iong ban pynpaw ïa ka dak jingsngew kaba la lynshop ha ka jingim jong u heprit Kyrshanbor uba dei ruh u khunswet.
U heprit Kyrshanbor Kharmudai, 7 snem ka rta la pyntip ba u la jahrngai katba u dang ïalehkai hajan ka iingsah lajong ha ka por sngi Balang ha ka por kumba 4 baje janmiet hynrei tang hapoh 24 kynta la lap ïa ka met jong u ha ka step sngi Palei na narud ka surok khlaw Mawpat ban leit sha NEIGRIHMS, Shillong.
Ïa ka jinglehniam ha phyllaw iing bad haduh ban da poi ha lum jingtep la pynïaid da ka Dorbar Shnong Nongrah da ka jingïashim bynta lang u Rangbah Shnong, u Secretary Shnong bad ki Executive Member jong ka shnong.
U Symbud Myntri Rangbah ka Jylla uba khmih ïa ka tnat Kam PohIing Bah Prestone Tynsong u la ïathuh ba la thaw da ka Special Investigation Team (SIT) ba la khlieh da u Superintendent of Police Bah Vivek Syiem.
U SP u la ong ba ki Pulit ki dang pynlong ïa ka jingtohkit kaba bniah ban lap dien ïa ki runar kiba donkti ha kane ka kam bymman.
Ka jingshah pynïap u heprit Kyrshanbor Kharmudai ka la jia tang hadien katto katne taiew ka jingïap jong i heprit Insaphira Lyngdoh Mawnai ha kaba ïa ka met jong i la lap ha kawei ka iing ba dang shna ha Nongrah Nonglum.
