Shillong, Rymphang, 13: Ka jingshah pynap shrip jong ki riewluilui ha ki riewshukor kiba ap kmang tang ban ïoh lute suk ïa ka umsyep jong kiwei ka nang ïai kiew na ka sngi sha ka sngi ha kane ka jylla Meghalaya. Ki riewshukor kiba riam dur bula ïalade ha ki dur bapher bapher ki ju pynap ïa ka shrip lyngba ki kor ki bor Digital ban ïoh lute ei khamakha ïa ka pisa kaba ki riewluilui ki la pynlang shitom ha ki Bank Account jong ki.
Watla ka tnat Pulit ka ju ïai pynmih ïa ki jingmaham na ka por sha ka por ban pyntip ba ki riewshukor ki ju pyntieng kohtympan da kaba pyndonkam ïa ki ktien byrngem byrsit ban phah kem lane ha ka ktien phareng kaba ngi ong ka “Digital Arrest” ne da kaba phah kem na iing hynrei ki dang bun byllai ki riewpaidbah ki bym da don eh ïa ka jingshemphang ïa ka bor jong ka Technology kiba shu ngat ha ka shrip jong ki riewshukor.
U Superintendent of Police jong ka East Khasi Hills u Bah Vivek Syiem u la ïathuh ba bun tylli kum kine ki jingjia ki paidbah ki ju ujor sha ki Pulit ha kylleng ka East Khasi Hills district.
Une u heh Pulit ka East Khasi Hills u la kyrpad ïa ki riewpaidbah ba kin long kiba kham husiar khnang ban lait na ka jingshah pynlong langknia ha ki runar kiba riam dur bula lyngba ki kor ki bor Digital.
