Shillong, Naitung, 12: Ka Iingbishar Meghalaya High Court ka la shah ïa ki nongleit riewblei (Yatra) sha krem Mawjymbuin ha ka shnong Mawsynram, da kaba buh ruh katto katne ki kyndon.
La kyrpad ïa ka Iingbishar kham mynshwa ban pynsuk ïa ka jingpynïaid ïa ka Yatra bad ki kynhun ki la mynjur ïa ki katto katne ki kyndon ban pynthikna ïa ka jingleit kan long kaba suk bad kaba ïaid beit ïaid ryntih.
Kine ki kynthup ba ki bor synshar district kin peitngor ba kane ka Yatra ka dei ban pynthikna ba kan long kaba ïaid beit ïaid ryntih.
Ki nongleit riewblei kim bit ban leh ïa kano kano ka puja ne jingleh niam hapoh ka krem bad kin ym rah ïa kino kino ki tiar na ka bynta kum kine ki jingthmu.
Yn shah ïa ki nongleit riewblei ban synreit um halor u maw hapoh ka krem, hynrei tang ha ka rukom ba shu synreit ïa ki symboh um bad ym ban theh um palat.
Ki nongpynïaid ki dei ban pynbiang hi ïa ki nongpahara ne ïa ki Volunteer kum ki nongpeit ïa ka leit ka wan ki ban ïarap ïa ka jingleit Yatra.
Ïa ka jingshngaiñ bad jingpynneh pynsah ïa ka suk ka saiñ baroh kawei kan long ka kamram jong ki bor synshar ka jylla.
“Haba pyrkhat ïa ka mat bad ka jingkyrkieh ba la pynpaw, bad ki kyndon ba la ai da ki nongshah mudui jong ka Jylla No. 1- 5 lyngba ka Deputy Commissioner, bad ïa ka jingkular ba la ai da ka Dorbar Shnong ka shnong Mawsynram sha ka Yatra ba la kdew, la bthah namarkata ïa u nongmudui un shim ïa ka jingkular ba ka jingleit riewblei ka dei ban long katkum ki kyndon ïa kaba la pynmih ha ka 10 tarik, Naitung, 2025, bad kane ka Iingbishar ka pynksan ruh ïa ka jingdonkam ban pynneh ïa ka jinglong ryntih bad ka jinglong riewblei bad ban kiar na kano kano ka jingpynjaboh lane ban pynthut ïa ka jingïaid lynti jong ki kali. Ka kyndon ba u nongpynïaid u dei ban thung ruh ïa ki Private Security lane ki Volunteer kum ki Traffic Warden na ka bynta ban ai jingïarap ha ka sngi ba la pynlong ïa ka Yatra bad ba dei ban bud ryntih ruh,” la ong ka Single Bench ba la khlieh da u Justice HS Thangkhiew ha ka hukum ba la pynmih ha ka sngi Thohdieng.
“Watla ïa ki jingpyrshah la pynpaw da ki nongshah mudui No. 6-8 ïa ka jingtheh um halor u maw, ban pynïadei ïa ki jinglong marryngkat bad na ka bynta ka jingmyntoi jong ka hok, la shah ïa u nongpynïaid (nongmudui) tang ïa ka jingsynreit um kum ka dak bad ban ym theh um halor u maw ha ka tarik ba la buh,” ka la bynrap.
Ka Bench, ka la buh sngi ban pynmih shuh shuh ïa ki hukum ha ka 31tarik, Naitung, 2025 bad ka la bthah ïa ki arliang mamla ba kin ïakren bad rai ïa ki tarik ban pynlong ïa ka yatra ïa kaba yn dei ban pyntip sha ki bor synshar district.
