Shillong Jymmang 28: Ki seng kiba don ha NEHU kiba kynthup ïa ka North Eastern Hill University Teachers’ Association (NEHUTA), North-Eastern Hill University Non-Teaching Staff Association (NEHUNSA) bad North-Eastern Hill University Students’ Union (NEHUSU), ki la kyrpad ïa ki dkhot jong ka Executive Council (EC) jong ka University ba kin nym leit ïashim bynta ha ka jingïalang ka ban sa long ha Delhi ha ka 30 tarik mynta u bnai.
Ha ka kyrwoh khubor ba la ïasoi lang ki la ong, “Kum ki dkhot ba don burom ka Executive Council-kaba dei ka Executive Body ba hakhlieh duh ka University, kaba dei ban peit ïa ki jingpynïaid ïa ki kam ki jam jong ka University katkum ka Act, Statutes bad Ordinance bad CCS Rules ka Sorkar India, ki lai tylli ki seng ka University ki kwah ban kyntu ïa phi ban nym leit ïashimbynta ha ka jingïalang jong ka EC ka ban long ha Delhi ha ka 30/05/2025.”
“Ki lai tylli ki seng ki kren shai ba kino kino ki dkhot kiba jied ban ïaid pyrshah ïa kane ka jingkyntu bad ym kheiñ snep ïa ka nongrim ba la shim da ki lai seng, yn kheiñ ïa ki kum ki nongïaleh pyrshah ïa ka bha ka miat ki samla pule, ki nonghikai bad ki nongtrei bad ïa ki seng jong ki bad kumjuh ruh ïa ka skulbah baroh kawei. Ngi khmih lynti ïa ka jingïatreilang jong phi,” la bynrap ki seng.
Katkum ka kyrwoh la ong ba ki lai seng ki sngewkhia jur ïa ka jinglong jingman jong ka University ha kane ka por ba mynta hadien ba u Vice Chancellor ba pura ula shim shuti Earned Leave katkum ka jingai jingmut jong u Director, Higher Education, ka Sorkar India naduh ka 15 tarik Naiwieng 2024, ïa kaba ula pynjlan haduh ka 2 tarik Lber 2025 bad haduh mynta um pat wan shimti ïa ka kam wat hadien ba la kut ka shuti hapoh ka Headquarter jong ka NEHU, Shillong.
“Kane ka long kum ka jingïai pep na ka kam hapoh ka Headquarter ha NEHU, Shillong la palat 193 sngi lane palat 6 bnai shisien jah. Ngi ki lai tylli ki seng ngi la shimkhia ruh ïa ka jingbym pat pynpaw paidbah ka Ministry of Education, ka sorkar India ha kaba ïadei bad kaiphod jong ka Inquiry Committee kaba tohkit halor ki kam jong u Prof Shukla,” ong ka kyrwoh khubor.
Kitei ki seng ki la kdew ruh ïa ka jingkren ba dang shen jong u Prof Shukla ba kheiñ poh ïa ka jingïakren bad ki jingmynjur ba la shim hapdeng ki kynhun ka NEHU bad ki dkhot jong ka kynhun ka Ministry of Education kiba la wan ïuhkjat ha NEHU ha ka 22 tarik Jymmang, kaba lah ban lam sha ka jingpynbeit noh ïa ki kynrum kynram ha NEHU.
