Shillong, Rymphang, 11: U National President jong ka National Peoples Party (NPP) u Conrad K. Sangma uba long ruh u Myntri Rangbah ka jylla Meghalaya ha ka sngi Baar u la hiar sha Nongstoiñ Constituency ban pan jingkyrshan ïa u kyrtong jong ka party u Bah Dressar Marngar na ka bynta ka elekshon sha ka Khasi Hills Autonomous District Council (KHADC) ka ban sa long shen.
Haba kyntu ïa ki nongthep vote ba kim dei ban khih jingmut ha ka jingpyrshang jong ki seng saiñ pyrthei kiba pyrshang ban pynngop bad pynsaphriang ïa ki jingtip kiba bakla, u Sangma u la kyrpad ïa ki paidbah ban pynjop ïa ka NPP kaba bat ruh ïa u lakam synshar hapoh ka jylla.
Kan don ka jingïakhluit kaba jur bha ha ka por elekshon, hynrei ynda ki la kut, ki briew kin sa kren biang shaphang ka roi ka par, ka jingim bad ka jingkyrshan kaba ki donkam,” u la ong bad bynrap shuh shuh da kaba ong, “ka party jong ngi ka don ïa ka jingbun paid ha ka Iingdorbar Thawaiñ ka Jylla. Dei tang ka NPP kaba lah ban ai ïa ka jingkyrshan kaba donkam bad ban wanrah ïa ka roi ka par kaba ngi dei hok ban ïoh. Namarkata, ka long kaba donkam eh ba ngin jied ïa ka Sorkar kaba lah ban ai ïa ka roi ka par.
“Ngim dei ban pyrkhat da kumwei pat hynrei ban jied ïa ka seng kaba bat ïa u lakam synshar,” la ïai ban u Sangma.
Da kaba pynkynmaw ïa ka thong jong ka NPP kaba buh shwa hakhmat ïa ka bit ka biang jong ki paidbah, u Sangma u la ong, “bun kin sa khlei bad kin sa kular ha ka saiñpyrthei, hynrei ngi don hangne ban shakri ïa ki paidbah bad ban wanrah ïa ki kam pynroi. Kata keiñ ka dei ka jingsynshar. Balei ngin shu ïa pynsngap sa rat ïa ki jingkynnoh ki bym don nongrim, haba, tang hadien ka elekshon, kito kiba kynnoh kin sa shu jahlngaid ryngkat bad kita ki jingkular jong ki. Pyrkhat bha ïa kaei ka ban jia hadien ka 24 tarik, Rymphang.”
U Sangma, haba kren halor jingkhang tih bad shalan dewiong ha ka jylla, u la ong ba dei tang ka NPP kaba la nud ban ïakhun pyrshah ïa ka jingshah khang ban tih bad ban shalan dewiong bad ka lajop tad haduh ban da pynïoh jingmynjur na ka bynta ban tih dewiong katkum ka juk stad saïan ha ka jylla.
“Ki ophisar na ka Ministry of Coal ki ladep sorjamin ïa ki par dewiong ha Jaiñtïa Hills bad shen kin sa leit sorjamin sa ïa ki par dewiong ha West Khasi Hills. Ki la jop ïa kawei na ki jingeh kaba jwat bha, bad ngi kyrmen ba kan wanrah ruh ïa ka jingkylla,” ula ong.
U la kular ruh ïa ki nongtih dewiong ba nangne shakhmat kim da donkam shuh ban ïoh jingmynjur na ka bynta ban tih dewiong.
“Ki nongtih syiap bad kiwei kiwei par barit kiba heh ym duna ïa ka 10,000 square feet, la kyntu ban pyllait noh na ki kyndon ba pyrkhing. Kum ka Sorkar, ngi la pynsngew sha ki tyndong skhor jong ka Sorkar Jylla ban pyllait na ki kyndon ba pyrkhing ïa ki nongtih par barit. Ngi thmu ban pynthikna ba ki nongtih marpohkhyndew kin ym mad shuh ïa kine ki jingeh,”la bynrap u Sangma.
U la pynkynmaw ruh ïa ki sienjam jong ka Sorkar ban kyntiew ïa ka jingïalehkai sports, ka pule puthi, ki jingtei bapher bapher ha kylleng ka jylla.
U la pyntip ruh ba ka jingshna ïa ka Football Stadium bad ka Track-and-Field Stadium ha Nongstoin kan ieng kum ka sakhi ïa ka jingkular jong ka NPP sha ki paidbah.
