Shillong, Jymmang, 25: Ka All India Save Education Committee (AISEC) Meghalaya Chapter ha ka sngi u Blei ka la iaroh ia ka jubab jong u Myntri ka tnat Pule Puthi ka Sorkar Jylla u Rakkam A Sangma halor ka Draft People’s Education Policy (PEP) ba la pyllait da ka AISEC, Meghalaya Chapter dang shen.
“Ngi kwah ban pyntip sha u Myntri ba ka AISEC ruh ka kwah ba ka jylla Meghalaya ka dei hok ban ïoh ia ka Education Policy kaba bha kaba iahap ka ban pynmyntoi ia ki paidbah bad ngim lah ban shu pdiang matlah ïa ka NEP 2020,” ong u Secretary ka AISEC u Dr. Batskhem Myrboh ha u kyrwoh ba la phah sha ki lad pathai khubor.
“Ha ka jingshisha, ka PEP ka dawa ba ka pule puthi ka dei ban don ha ka thup jong ka jylla, namarba ka jylla ka lah ban bishar kham bha ïa kaei ka jait jingpule kaba donkam ïa ki nongshong shnong jong ka,” u la ong.
“Ngi kwah ban pyntip sha ka Sorkar Jylla ba ka jingpyntreikam kyrkieh ïa ka FYUP khlem da thung kham bun ki nonghikai ka la nang pynsyrtok ïa ki nonghikai bad ïa ki khynnah pule. Bun ki kot thymmai kiba la hikai mynshuwa ha ka kyrdan Post Graduate la pynrung ha ka lynnong (syllabus) jong ka Under Graduate bad la pynrung ruh ïa ka bynta jingwadbniah khlem da thung ne ai jinghikai pyntbit shwa ïa ki nonghikai ha ka rukom wadbniah. Ka jingpynkiew ïa ki Core Paper na ka 8 sha ka 15 haduh ha ka Third Year (ka jingkiew kaba jan 100 percent), ka jingpynkiew ïa ki Number of Credit, bad ka jingpynrung sa shisnem ïa ka prokram UG ka la pynsyrtok ïa ki nonghikai bad kan ktah haduh katta katta ïa ka pule ka puthi jong ki khynnah pule bad kan pynbor ïa ki ban iehnoh shiteng por ïa ka jingpule,” la ong shuh shuh u Secretary ka AISEC.
“Katkum ka jingïakren markhmat jong nga bad ki katto katne ngut ki Principal, la ïoh jingtip ba ki kolej ki ladep ban mad ïa ka jingpep shiteng jong ki khynnah pule (watla ïa ka NEP la pynwandur tang ban shu riam dur bula najrong). Kane ka mat ka donkam ïa ka jingbishar bad ka jinglum jingtip kaba bniah bha khnang ban lap ïa ka daw tynrai bad ka jinglong jingman ba shisha,” u la ong.
Shuh shuh, ka AISEC kam ïohi ïa kano kano ka daw ba balei ki khynnah pule kiba kwah ban pule ha Meghalaya ki hap ban thoh ïa ka eskamin CUET. Ki jingeh kiba ki khynnah pule bad ki kmie ki kpa ki la ïakynduh ha ka CUET lah ban kiar noh.
Ka AISEC ka kyrpad ïa ka Sorkar Jylla ba kam dei ban shim ïa kine ki sienjam ba kyrkieh ban pyntreikam kyrkieh ïa ka NEP ha ki skul.
Ka AISEC, Meghalaya Chapter ka sngewkhia bha ïa ka jinglong jingman jong ka pule puthi, khamtam ha ki thaiñ nongkyndong.
“Katba dang ap ban pynkhreh janai ïa ka Policy Document ïa kaba yn sa pynmih ha ki khyndiat bnai ban sa wan, ngim sngew eiei ban ïasam paidbah ïa ka Draft PEP bad ka Sorkar Jylla. Ka AISEC ka long kaba kloi ban ïatreilang bad ka Sorkar Jylla,” la bynrap u Dr. Myrboh.
