Shillong, Rymphang 22: Ka Federation Khasi Jaiñtia Garo People (FKJGP) West Jaiñtia Hills District ka la kren shai ïa ka Sorkar Pdeng lane ïa ka Northeast Frontier Railway (NFR) ba kim dei ban wanrah ïa ka lynti rel sha rilum Jaiñtia katba ym pat don ïa ki aiñ ba skhem.
Ka jingpyrshah na ka liang jong ka seng ka long hadien ka jingmih ka khubor ba ka NFR ka thmu ban sorjamin ïa ka lynti Rel na Bhoksong, Rajagaon, Baithalangso, Jengkha, Kherani bad Umrangso ka ban pynïaosh haduh Jowai.
Ka FKJGP ka la phah ruh ïa u kyrwoh sha ka Northeast Frontier Railway (NFR) ba ka dei ban sangeh mardor ïa ka jingthmu jong ka ban sorjamin ïa ka lynti Rel sha rilum Jaiñtia.
Kane ka jingpyrshah jong ka seng ka long hadien ka jingmih ha ki lad pathai khubor ba ka Northeast Frontier Railway (NFR) ka thmu ban sorjamin biang sha rilum Jaiñtia na ka bynta ban pynkloi ïa ka jingshna ïa ka lynti Rel. “Ka seng ka phah ïa ka khubor kaba shai sha ka NFR ba kam dei ban phohsniew ïa ka lynti Rel sha rilum Jaiñtia namarba ka seng ka la long kaba la khreh ban ïa pynibor lada na ka liang jong ka NFR ka ïaid shakhmat,” ong u kyrwoh.
Halor kine kiei kiei baroh, ka FKJGP ka maham ïa ka NFR ba kam dei ban leh tam. “Daleilei ngin ym ailad ïa ka jingpyntrei ïa ka lynti Rel ba kan ïaid sha khmat wat lada ka Sorkar ka thom biang da ka bor kumba ka la jia ha kine ki khyndiat bnai kiba la dep,” la maham ka seng.
Ka seng ka kyntu ïa ka Jaiñtia Hills Autonomous District Council (JHADC) ba kam dei ban ai ïa ka No Objection Certificate (NoC) sha ka Northeast Frontier Railway (NFR) na ka bynta ka lynti Rel katba ka Sorkar kam pat lah ban wanrah ïa ki aiñ kiba khlaiñ ki ban ïada ïa ngi ki ritpaid na ka jingwan rung kyrthep ki mynder ha ka Bri u Hynñiewtrep.
