Shillong, Jylliew, 16: Ka All India Garo Union (AIGU) ka la phah ïa ka jingai jingmut halor ka Reservation Policy sha ka Expert Commitee ban pynneh ïa ka ‘Status Quo.”
Ha ka dorkhas ba la phah ha ka sngi Saitjaiñ, ka Union ka la kyntu ban kiar na kano kano ka jingpynbeit thymmai (ïa ka Reservation Policy) namarba kan pynmong ïa ka jingsngew jong ki jaidbynriew Garo.
“Lada jia ba ka don kano kano ka jingpynbeit thymmai ïa ka Policy, kan pynmong haduh katta katta ïa ka jingsngew jong ki Garo, bad ka ban ym long na ka bynta ka jingmyntoi ïa ka jylla Meghalaya baroh kawei. Ka lah ruh ban mih ka jingïakhih paidbah. Namarka, na ka bynta ka jingmyntoi jong ki paidbah ba bun balang, dei ban pynneh beit ïa ka ‘Status Quo”, la ong President ka AIGU u Elbarth Marak.
Ka Union ka la ong ba ka Reservation Policy ka dei kaba long markatjuh bad kaba la wanrah ruh ïa ka jingmyntoi naduh u snem 1972.
“Ïa mynta ka jingïabhah hapdeng ki jaidbynriew bapher bapher ha ka jylla Meghalaya ka dei kaba long markatjuh bad lada ka don kano kano ka jingpynbeit thymmai yn lah ban pdiang da leilei ruh em,” la bynrap ka AIGU.
Ka la bynrap shuh shuh ba ka jingdawa ban khmih biang ïa ka Policy ka dei kaba la wanrah da ki nongpyrta shla jong ki seng saiñpyrthei na ka bynta ki jingmyntoi politik, da ka buit ba kam ba kam don ka jingïaryngkat bad ban ym burom shuh ïa ki paid Garo.
