Shillong, Nohprah, 15: Ka Khasi Students Union (KSU) East Jaiñtia Hills District ha ka Lah Sngi u Blei ka la dawa ïa ka Meghalaya State Pollution Control Board (MSPCB) ban weng noh ïa ka jingpynbna kaba la pynmih ha ka 18 tarik, Naiwieng 2025 na ka bynta ban pynlong ïa ka jingpynsngew paidbah (Public Hearing) ha ka 19 tarik, Nohprah 2025 na ka bynta ban shna ïa ka karkhana pynmih dewbilat jong ka Shree Cement Private Limited ha Kharsiang Lum Pyrshim kaba hap hapoh u pud u sam jong ka shnong Daistong, Elaka Nongkhieh, East Jaiñtia Hills District.
Ha kane ka sngi, ki nongïalam ka seng ki la aiti ïa ka dorkhas ha u Member Secretary jong ka MSPCB.
U General Secretary ka seng u Bah Kwilnis Suchiang ha ka jingïakren bad ki lad pathai khubor u la ong ba jingïasoi ïa ka soskular hapdeng u Syrpaibha Sukhlaiñ bad ka Shree Cement Private Limited ban ai ïa ka jaka jong u ban shna ïa ka karkhana dewbilat ka dei ka jingpynkhein ïa ka Meghalaya Land Transfer Act 1972 kaba la khang pyrshah ba ki riewlum kim lah ban die lane ban ai ïa ka jaka jong ki sha ki briew ki bym dei ki riewlum.
Ka seng ka la aiti ruh ïa kane kajuh ka dorkhas ha u Deputy Comissioner ka East Jaiñtia Hills District.
