Shillong, Risaw, 16: U Myntri Rangbah ka jylla u Conrad K Sangma ha ka sngi Palei la maham tyngeh ïa ki riewpaidbah ba kim dei ban pynsaphriang ïa ki khubor hamsaïa khlem da tip tynrai ïa ka jingshisha namarba ka lah ban lam sha u pud kaba lah ban ktah ïa ka shongsuk shongsaiñ bad sha ki jingjia ba sngewsih.
U Myntri Rangbah u la kyrpad ïa ki nongshong shnong ba kin long kiba husiar na ki khubor lamler bad ki jingpyntip ha ka rynsan Social Media, da kaba ban jur ïa ka jingdonkam ban pynshisha ïa ki jingtip shwa ban leh eiei.
U la kyntu ruh ïa ki paidbah nongshong shnong ban shaniah ha ki nongïalam shnong, ki dorbar shnong, bad ki bor Pulit haba don kino kino ki jingeh.
“Nga kyrpad ïa ki nongshong shnong ba shwa ba ngin leh eiei ngi dei ban pynthikna ïa kano kano ka jait jingtip bad ban nym shim ïa ka aiñ ha la ki jong ki kti bad ha kano kano ka por ba jia ka jinglong jingman ngi dei ban shaniah ha ki nongïalam shnong jong ngi, ha ki dorbar shnong, ha ki rangbah shnong bad pyntip sha ki bor Pulit khnang ba ki Pulit kin dup shim ïa ka sienjam kaba dei,” u la ong.
“Ngan kyntu ruh ïa ki lad pathai khubor bad kumjuh ïa ki riewshimet kiba don ïa ki Channel bapher bapher ne ki Channel YouTube ki bym dei ki lad pathai khubor ba la ïoh jingithuh, ba kin don ïa ka jingkitkhlieh ban ym pynphriang ïa ki khubor hamsaïa tang ban ïoh kamai,” la maham u Myntri Rangbah.
