Shillong, Nailar, 01: U MLA barim jong ka South Tura Constituency u John Leslee K. Sangma ha ka sngi Palei u la ai jingïaroh ïa u Myntri Rangbah ka jylla u Conrad K Sangma uba la pynrem jur ïa ka jingleh jong ki nongpynïaid ïa ka Olympic 2024 kaba long ha nongbah Paris, France da kaba pyni ïa ka jingïa ak kaba pynwandur ïa ka jingkhawai miet ba khatduh jong u Trai Jisu bad ki Synran jong u ne ka ‘Last Super.’
U la ong ba kato ka jingleh ka ktah bha ïa ki Khristan bad ka jingpynrem jong u Myntri Rangbah ka dei kaba shongnia bad kaba dei hi ruh ban pynrem.
Hynrei u la ong ba u sheptieng ïoh ba kane ka jingpynrem jong u Myntri Rangbah ka dei pynban tang ka jingpynthame ïa ki paidbah nongshong shnong ka Jylla bad ïoh ba ka dei tang ka jingleh mynleh ban shu pyni rong shabar ïa ka jingsngewkhia jong u.
U John Leslie u la ong, lehse ka lah ban dei ruh tang ka jingpynthame ban pynmyllung ïa ki paidbah namarba ka National Peoples Party (NPP) ka dang shu shah rem ha ka elekshon Lok Sabha kaba dang shu dep long shen bad lehse ka dei ka jingpyrshang ban khroh ïa ki paidbah namarba ka elekshon shiteng samoi ha Gambegre ka la hajan.
Ha u kyrwoh khubor, u John Leslee u la ong, “lada u Myntri Rangbah ka jylla u sngewkhia shisha ïa ka jingktah ïa ka Niam, u la dei ban leh eiei naduh u bnai Rymphang ha ka por ba u General Secretary jong ka NPP na Williamnagar u Georgeman Marak ryngkat bad ki paralok jong u ki ïa pynlong kamkai ïa ka jingrwai Niam da kaba pynkylla ïa ka kyrteng u Jisu sha ka kyrteng jong ka NPP.”
Lyngba u kyrwoh khubor, u John Leslie u la phah ruh ïa ka Video kaba pyni ba ki nongïalam ka NPP ki la ïa rwai da kaba pyndonkam ïa ka sur jong ka jingrwai niam kaba ong ‘I have decided to follow Jesus’ ne ‘Nga la kut jingmut ban bud ïa u Jisu.” “Hynrei kine ki nongïalam ka NPP ki la pynkylla da khongpong da kaba rwai ‘I have decided to follow NPP’ lane ha ka ktien Khasi kaba mut ‘Nga la kut jingmut ban bud ïa ka NPP.’
U John Leslie u la bynrap lang ïa ka ejahar kaba u ladep ujor ha ka 20 tarik, Rymphang, 2023 pyrshah ïa u General Secretary jong ka NPP u Georgeman Marak bad ïa ki paralok jong u ha Tura Police Station.
U la kynthah ruh da kaba ong, “ngam shym la ïoh sngew ïa ka jingpanmab ne ka jingpynrem na ka Party halor kane ka jingjia lane na u Conrad Sangma namar ka jingpynmong ïa ka jingngeit Khristan da ki dkhot ka NPP. Kiba donkti, la ong, ba ki la pynpaw ïa ka jingsngew babe hynrei ki nongïalam pat?”
“Ka jingshlei ka sor Tura da ki dukan die kiad (Wine Store) da kaba leh bym suidñiew ïa ka jingsngew jong ki Khristan bad ki Balang ha Tura bad ailad ban buh ruh ïa ka Wine Store ba la ai kyrteng ‘Heaven Eleven’ hapoh ka Constituency jong u da ujuh u briew u bym burom ïa ki jingrwai Niam Khristan bad ban pynlong ïa ki prokram sorkar wat ha ka sngi u Blei ka dei hi ka jingbym burom ïa ka jingngeit Khristan jong ki riewngeit. U Myntri Rangbah ka Meghalaya u dei leh ruh da ki kam kumba u kren lada u ieng ha ka nongrim kaba ma u hi u kren bad lada u dei u Khristan ba shisha,” la ong shuh shuh u John Leslie.
