Shillong, Nailar, 28: Hadien ka jingpynibor biang jong ka sorkar Assam ha ka shnong Mawsikar, kawei na ki shnong khappud kaba don ha ka thaiñ Langpih ban shna pynheh ïa ka surok khlem da pyntip sha ki bor ka Sorkar Meghalaya ka la pynlong ym tang ïa ki paidbah nongshong shnong ban bitar hynrei wat ïa ka Federation of Khasi Jaiñtia and Garo People bad ïa ka Khasi Student Union ban bitar ïa ka jingleh tam jong ka Sorkar Assam.
Ki nongïalam jong ka KSU bad ka FKJGP Ri Muliang Circle ha ka Palei ki la leit ban ai mynsiem ïa ki paidbah nongshong shnong ban ym ailad ïa ka sorkar Assam ba kan thom da ka bor bad ha kane kajuh ka sngi ki la leit ruh ban synran ïa ki nongïalam jong ka shnong Mawsikar sha ka ophis jong u Deputy Commissioner ka West Khasi Hills District ban aiti da ka dorkhas ban phah khang ïa ka jingthmu jong ka sorkar Assam ban pyntrei ïa ka surok bad ban ym shah ban wanrah ïa kino kino ki kam pynroi katba ym pat lah ban ïa pynbeit ïa u pud u sam hapdeng ka Meghalaya bad ka Assam.
Ha ka jingïakren bad ki lad pathai khubor hadien ka jingïakynduh ïa u Deputy Commissioner na ka liang jong ki nongïalam jong kine ki ar tylli ki kynhun ki la pynpaw ïa ka jingnynniaw halor ka jingpynsahteng jong ka Sokar Meghalaya bad ka sorkar Assam ban pyndep noh ïa ka jingïapynbeit ïa u pud u sam hapoh ka Langpih Sector bad ki la dawa ruh ïa ka sorkar Meghalaya ba kam dei ban shu shah jem katba leh ka sorkar Assam.
