Shillong, Jymmang, 29: Ka Myntri ka Sorkar Jylla kaba khmih ïa ka tnat ka Koit ka Khiah ka Dr. Ampareen Lyngdoh ha ka sngi Palei ka la ong ba ka Sorkar Jylla ka la long kaba pynkhreh ban ïakhun pyrshah lada wan lynshop u khñiang jingpang COVID-19 thymmai bad kyrpad ruh ïa ki paidbah nongshong shnong ba kin bud ryntih ïa ki jingbthah ban ïada na ka jingsaphriang u khñiang jingpang ha ka jylla.
Ha ka jingïakren bad ki lad pathai khubor, ka Dr. Ampareen ka la ïathuh ba u khñiang jingpang Covid ba thymmai, ba la lap ha ki katto katne ki bynta ka pyrthei bad na kane ka daw, ka Sorkar ka la shong ïa ka jingïalang pyrkhat kam ban pynkhreh lypa.
“U Covid mynta u long kum ka jingpang Flu ha ka spah snem ba 19 haba ym pat don dawai ban sumar ha kito ki snem hynrei mynta ïa u Covid ka sorkar ka la pynkhreh bad ka la peitngor ruh ïa ka jinglong jingman,” la bynrap ka Myntri.
Haba banjur ïa ka jingïatreilang na ki paidbah ban ïada ïa ka jingsaphriang jong u Covid ha ka jylla, ka Myntri ka la ong, “lada don mano mano kiba ïoh ïa ka jingpang jyrhoh kaba slem, ka jingpang shitmet lane kino kino ki dak kiba pyni ba ki ïoh ïa u Covid sngewbha ban leit phah test noh mardor. Kaba ar, lada bad ynda ka jingleh test ka paw ‘Positive’ sngewbha ban bud ïa ki kyndon. Ngi dei ban kynmaw ïa ka SOP jong u Covid. Ka jingïada biang por ka kham lah ban pynkoit khamtam lada ka dei leilei ïa u Covid.”
Ka la pyntip ba ka Sorkar India ka la shim ïa ki lad ki lynti ban ïakhun pyrshah ïa u khñiang jingpang Covid-19 ba thymmai.
Ka Myntri ka la ïathuh ruh ba ka Meghalaya ka dap pura ïa ka Oxygen, ki jingthiah ha ICU, ki dawai dashin. “Kane ka dei ka jingpynkhreh lypa jong ka Sorkar kaba ngi ladep ïakren,” ka la bynrap.
Haba kylli, ki Myntri ka la ïathuh shuh shuh ba baroh ki PHC, CHC ki dei kiba la biang bha ïa ki tiar ki tar ban ai jingsumar ïa ki bapang Covid.
“Haoid, ka Centre ha Byrnihat ka dang dei tang ma ka, kaba ngim pat lah ban rai kumno ban pyndonkam ïa ki tiar ba la don lypa hynrei nga kwah ban pyntip sha ki paidbah ba ngi la trei shitom bad ngi kyrmen ba ngin sa nang ïai shna shuh shuh ïa ki lad jingsumar, baroh ki centre kiba don ha kylleng ka jylla ki dei ban pynthikna ba ngin pyndonkam ïa ki,”ka la ong.
“Nga la leit dang shen sha Pariong bad nga kyndit ban ïohi ba ka Prefab Structure ïa kaba la shna ha ka por ba dang don ka jingpang khlam Covid mynta la pynkylla sha ka Paediatric Training Centre na ka bynta ki khunlung ba dang shu kha. Kine ki dei ki lad bad ki kam ba la pyntyllun ha kylleng ka jylla,” la ong ka Myntri.
