Shillong, Nailar 26: Ka Sorkar Jylla ka la rai ban thaw lai tylli ki Sub-committee ban ïakren bad ka Garo Hills Autonomous District Council (GHADC), Khasi Hills Autonomous District Council (KHADC) bad ka Jaiñtia Hills Autonomous District Council (JHADC) halor ka jingthmu ban siew tulop ïa ki nongtrei jong ki naduh ka 1 tarik, Naiwieng bad ban weng ïa ki jingeh jong ki Council ha ka liang jinghiran pisa bad ka jingïakynduh mawsiang ha ka rukom pynïaid kam da kaba pynthikna ba kin pynneh ïa ka bor ka ikitar jong ki katkum ba la pruiddak ha ka riti synshar jong ka Ri.
“Ki sub-committee kin ïakren bad ki lai tylli ki ADC ha kine ki 45 sngi ban wan bad kin sa aiti ïa ka kaiphod sha ka Sorkar Jylla,” la ong u Myntri Rangbah ka Jylla u Conrad K Sangma ha ka jingïalang bad ki lad pathai khubor hadien ba la wai ka jingïalang jong ka Kynhun Myntri ha ka sngi Baar.
“Ka Sorkar kan sa shim ïa ka rai katkum ki kaiphod ba la ïoh na ki Sub-committee kumno ban ïaid shakhmat bad kawei pa kawei ka ADC,” u la bynrap.
U Sangma u la kren shai ruh ba ki ADC ki don ka jinglaitluid ban kyntait ne pdiang ïa kine ki jingtyrwa da kaba ong, “kane kam dei kaba donkam. Kane ka dei tang na ka bynta ka jinglong jingman ban kyrshan pisa ïa ki council.”
U la pynthikna ba ka Sorkar kan ym tuklar ïa ka jingtreikam jong ki Council, kynthup ïa ki kam khyndew, ki hok tynrai, bad ki bor ba la pynkupbor ha ka riti synshar.
“Namarkata, kam don jingkylli bad kam don lad ïa ka Sorkar Lylla ban tuklar ha kano kano ka rukom ïa ki jingtreikam bapher bapher jong ki ADC.”
U Myntri Rangbah u la ong ba ka Sorkar kan ai jingkyrshan pisa ïa ki ADC kynthup ïa ka jingsiew tulop katkum ka jingpynbeit.
Ki ADC kin donkam ban don ïa u Principal Secretary, kaba bha eh ïa u ophisar MCS ne IAS ba la kham rangbah ban peit ïa ka jingpynïaid ïa ka pisa bad ban pynthikna ba ïa ka pisa la pyndonkam kyrpang na ka bynta ka tulop.
Da kaba pynpaw ba ka jingshim rai jong ka Sorkar kum ka mat kaba kongsan, u Sangma u la ong ba ki ADC khamtam ka GHADC ki ïakynduh jingeh bha ha ka liang ka pisa ha kaba ka don ka jingduna kaba jur hapdeng ka jinglum khajna bad ka jingdonkam ban siew ïa ka tulop.
“Ha u snem baladep, ka GHADC ka donkam ban siew tulop kaba kumba T.70 klur katba kaba mih na ka jinglum khajna baroh ka long tang hapoh T.25 klur. Kumta ngi kren shaphang ka jingduna kaba T.40-45 klur. Kumjuh ruh ha JHADC ka don katto katne ka jingduna ha ka liang ka khajna bad kumta ka Council kam kotbor ban siew tulop. Ka KHADC ka don ha ka kyrdan kaba kham biang shikatdei eh ha kine ki 15-20 snem ba la leit noh namarba ki nongtrei ki kham duna bad ka don tang kumba 800 ngut ki nongtrei,” u la ong.
U la ong ba ka GHADC kam shym la ailad ban thungkam ha kine ki 6-7 snem namar kane ka jingdon ki nongtrei la pynhiar na ka 2300 ngut sha ka 1300 ngut. Kumjuh ruh ka jingdon jong ki nongtrei ha JHADC ka la hiar na ka 2000 tam sha ka 1300-1400 ngut.
