Shillong, Nailur, 18: Ka All Khasi Meghalaya Tourist Taxi Association (AKMTTA) ka la rai ban pynkut noh ïa ka jingïakhih ba khlem pud sngi ban pyrshah ïa ka jingrung laitlan jong ki kali kamai Tourist sha ki jaka jngohkai pyrthei kiba don ha ka jylla Meghalaya.
Ïa kane ka rai la shim hadien ka jingïalang bad ka Deputy Commissioner jong ka East Khasi Hills ka Kong R.M Kurbah kaba la kular ïa ka seng ba ka Sorkar Jylla kan sa pynlong ïa ka jingïalang ha ka sngi Baar ban sngap ïa ki jingeh ba la pynsngew da ki nongñiah kali kamai Tourist.
“Ka Association ka la rai ban pynsangeh noh ïa ka jingïakhih ba khlem pud sngi haduh ka sngi Baar jong ka taiew ban wan,” ong u nongaiktien jong ka AKMTTA u Bah Balajied Jyrwa ha ka jingïakren bad ki lad pathai khubor hadien ba la wai ka jingïalang ha ka sngi Palei.
U la ïathuh ba ha ka jingïalang yn sa don lang ki nongmihkhmat na ka tnat Kam Pohing, ka tnat Transports, ka tnat Jngohkai Pyrthei bad ki dkhot jong ka Association.
“Ngin sa shim biang ïa ka rai da kaba pynshong nongrim ïa ka jingïakren kaba mih na ka jingïalang kaba la pynbeit,” la bynrap u Bah Jyrwa.
Ka jingshim rai ban khot ïakren ïa ka Association ka long hadien ba ki kali na ka jylla Meghalaya ki la shah khang ban rung sha Assam kum ka jingpyrshah ïa ka jingïakhih ba khlem pud sngi jong ka AKMTTA kaba la dawa ruh ba dei ban khang lut ïa ki kali kiba nabar ban rung sha ki jaka jngohkai pyrthei kiba don hapoh ka jylla.
U Bah Jyrwa u la kam ba ka jingïakhih jong ka Association ka long da ka lynti kaba jai jai bad ka bym shym la ktah satia ïa ka leit ka wan jong ki nongjngohkai pyrthei bad ïa ka shongsuk shongsaiñ.
“Ka jingïakhih ka shu long beit tang da kaba shu sam ïa ki kot lyngkdop ban pynsngewthuh ïa ki paidbah halor ki jingeh ba la ïakynduh da ki nongñiah kali kamai Tourist,” u la ong.
U nongaiktien jong ka Association u la pynshai ba ka jingshah khang ki kali na ka jylla Meghalaya ban rung sha Assam ka dei tang ka jingpynsngewthuh bakla da mano re.
“Ka AKMTTA kam shym la khang ïa ki kali Assam ban rung sha Meghalaya, hynrei ka jingdawa ka long ba dei ban pyrkhing ïa ka jingrung jingmih ïa ki kali kiba nabar ka jylla sha ki jaka jngohkai pyrthei kiba don ha ka jylla Meghalaya,” u la ong.
“Ngim pat ju khang ïa ki kali kiba kit ïa ki nongleit ne ïa ki nongpang. Tad haduh kane ka sngi, ym shym la khang ïa ki kali Assam ban kamai ha Meghalaya. Namarkata, ka don ka jingpyrshang kaba jur ban pynsngewthuh bakla ïa ki nongñiah kali kamai Tourist ha ka jylla Assam. Ngi kwah ban pynpaw da kaba shai ba kane ka jingïakhih kam dei pyrshah ïa ka Assam hynrei ka dei pyrshah ïa ka Sorkar Jylla. Ki bor synshar district kin sa ïakren ïa kane ka mat bad ki bor synshar district ka Assam namarba kane ka dei ka kam jong ki ar tylli ki jylla bad kam don jingïadei eiei bad ka Association,” la bynrap u Bah Jyrwa.
Shuh shuh u la bynrap, “ka Association ka kyrmen ba kan mih ka jingseisoh halor ki jingdawa ynda la ïakren ha ka jingïalang ka ban sa long. Ka la don ruh ka jingujor PIL halor kane, bad ngi kyrmen ba ka Kashari kan bishar lem halor ka jingeh ba la mad da ki nongñiah kali kamai Tourist.”
Katkum ka jingong jong u, ka AKMTTA ka dei ka kynhun ba la rejistar bad ka dei ruh ka kynhun kaba don lang ki nongñiah kali bad ki trai kali.
