Shillong, Jymmang, 01: Ki nongïalam jong ka Jaiñtia National Council (JNC) bad Hynñiewtrep Youths Council (HYC) East Jaiñtia Hills ha ka sngi Palei ki la dawa ïa ki bor pynïaid jong ka Power Grid, Khliehriat, East Jaiñtia Hills District ban tynrong biang ha ki 9 ngut ki Home Guard ban ap pahara ïa ka ophis.
Ki nongïalam jong ka JNC ba la lamkhmat da u President Bah Sambormi Lyngdoh bad ki nongïalam ka HYC ba la ïalam da u President Bah Preios Pale ki la byrngem ban leh da kaba tyngeh lada ka Power Grid kam shimti biang ïa ki 9 ngut ki Home Guard kiba la trei la kumba 15 snem.
Ha ka jingïakynduh ïa u Chief Manager jong ka Powergrid NERTS u Santanu Das, u Deputy Manager u K.K.Boro, u Assistant Manager u Sumit ki la pan por tad haduh ka 6 tarik mynta u bnai ban pynbeit halor kane ka mat namarba ki hap ban ap ïa ka jubab na ki bor bahalor.
Ka jingweng kyndit kyndit ka la pynsngewsih kthang ïa ki 9 ngut bad kiba sah mynta ha ka umdum.
Ki khyndai ngut ki Home Guard kiba la shah weng ki dei ki trai shnong na ri lum Jaiñtia bad dei halor kane ka nongrim ba kine ki ar seng ki la pynpaw ïa ka jingsngewkhia ïa ka jingshah pynduhkam bad ïa mynta kine ki khyndai ngut ki la shu shong khlem kam khlem jam bad kane ka la wanrah jingeh bha ïa ki kum ki nongpyndap pynbiang ïa ki jingdonkam ha ka ïing ka sem.
“Ngi dawa ïa ka Power Grid ban dang pynneh ïa ki khyndai ngut ki Pulit pahara jong ka Home Guard, ban ai biang ha ki ïa ka kam kumba ki ju trei,” la ong u Bah Sambormi.
“Ha ka jingïakren bad ki bor ba dei peit jong ka Power Grid ngi lap ba ka don ka jingthmu ban thung noh da kiwei ki nongtrei kiba na kawei ka Agency ban long kum Security Guard bad ïa ka jingbit ladep ai da ka Sorkar Jylla ban shim noh da kiwei na ka Central Agency. Ngi pynrem jur ïa ka Sorkar Jylla ka bym don ka jingkitkhlieh na ka bynta ka tnat Civil Defence and Home Guard. Ha ka jingshisha haba ka Sorkar Jylla la don lypa ïa ka tnat Civil Defence and Home guard balei pat ka dang ai jingbit ïa kita ki Central Agency haba ki Home Guad ki jong ngi ki lah ban trei tang hapoh ka jylla Meghalaya katba ki Central Agency pat ki lah ban trei ha kano kano ka bynta hapoh ka ri India. Na kata ka daw ha ka jingshisha ka Sorkar Meghalaya kam dei ban ai jingbit ïa kiwei pat ki Agency kiba nabar ban shu wan knieh ïa ki kam ki jam jong ki briew kiba napoh ka jylla,” la ong shuh shuh u Bah Lyngdoh.
Haba maham ïa ka Power Grid lada kam lah ban pynneh ïa kine ki khyndai ngut kiba la shah weng kam, u nongïalam jong ka JNC u la ong, “ka seng kan ïaid shakhmat ban leh da kaba tyngeh namar kane ka jingleh la sngewthuh ba ka dei na ka Sorkar Jylla. Ka seng kan sa ïakren ruh bad u Myntri uba dei peit ïa kane ka bynta ba ym dei ban shu ailad ïa kita ki Agency kiba wan nabar katba dang don ki briew la jong kiba napoh ka jylla.”
“Kane kam dei kaba la jia tang hangne hynrei ka ju jia ha kylleng ki jaka namar haba peit ha ki karkhana shimet kiba don hapoh East Jaiñtia Hills District ruh la lap ba ki ju wanrah briew na kiwei pat ki Agency kiba nabar ban trei kum ki Security Guard bad kane hi ka pynpaw ba ka Sorkar ka kheiñ poh ïa ki briew lajong kiba ladep ïoh ïa ka jinghikai kaba paka ban trei kum ki Security Guard. Ngi phah ïa ka khubor kaba shai sha ka Sorkar Jylla ba kane ka jingailad ïa ki Company bad ïa ki ophis sorkar ban wanrah ïa ki Agency kiba nabar ka long kum ka jingknieh ïa ka kam ka ja kpoh jong ki briew la jong kiba napoh ka jylla,” la ong u Bah Lyngdoh.
Ka Seng ka la kyntu ïa ka Sorkar Jylla ba ka dei ban pyrkhat shwa ïa ka tnat Home Guard jong ka jylla hynrei lada ka lada ka tnat Home Guard kam lah ban pynbiang briew ka seng kam pyrshah ïa ka jingwan ki Agency kiba nabar hynrei katba dang don hi ki briew napoh ka jylla dei ban thep shwa ïa ki briew la jong.
