Shillong, K’lyngkot, 15: Ka Kynhun Myntri jong ka Sorkar Jylla ha ka sngi Balang ka la mynjur ban wanrah ïa ka jingpynbeit thymmai ha ka Meghalaya State Investment Promotion and Facilitation Act, 2024, kaba pynthikna ba kan ym don ka jingktah ïa ka Meghalaya Land Transfer Regulation Act, 1971 haba kyntiew ïa ki nongbei tyngka ha kane ka jylla.
“Ngi la weng noh ïa ka Para 34 da kaba bynrap ba kane ïa kane ka laiñ ha kane ka Aiñ khnang ba kan ym pynduh noh ïa ka Meghalaya Land Transfer Regulation Act, 1971,” ong u Myntri Rangbah ka Jylla Conrad K. Sangma ha ka jingïakren bad ki lad pathai khubor hadien ba la wai ka jingïalang.
U la pynbna ba ka Sorkar ka la rai ban pynkylla kyrteng ïa ka Investment Meghalaya Agency (IMA) kum ka Meghalaya Investment Promotion Authority (MIPA) lyngba ka jingpynbeit thymmai.
“Ka jingmut ka long ban ai ïa kane ka kyrteng kaba kham bha bad ka rukom treikam kaba kham bha ïa ka tnad kumba ngi tip ïa ka aiñ hi la jer da ka ka Meghalaya State Investment Promotion and Facilitation Ordinance bad namar kata katkum ka aiñ hi, ngi la jer kyrteng mynta da ka MIPA ha ka jaka jong ka IMA,” la bynrap u Sangma.
U Sangma u la ïathuh ba la shim ïa kane ka rai hadien ka jingïalang kaba la long bad ka kynhun jong ki MDC ka KHADC ba la ïalam da u Chief Executive Member (CEM) Bah Pynïaid Sing Syiem, kiba la pynpaw ka jingsngewkhia halor kane ka kam.
U la pyntip ba ka Sorkar ka la shim ïa ka rai ban bsut ïa ka jingai jingmut ba la ai da ka KHADC, kaba kynthup ïa ka jingpynbeit thymmai ïa ka Para 34 jong ka Aiñ.
“Nga kwah ban pynshai ba kane ka Article 34 ka long kaba kyrpang bha ïa ki aplikeshon phorm ba ju pyndonkam. Ha ki por ba mynshuwa, ka Single Window Agency (SWA) ka dawa ba ki katto katne ki aplikeshon dei ban ai sha ki ha ki katto katne ki phorm, ka MUDA ka dawa ba ki aplikeshon ki dei ban ai ha ki katto katne ki phorm. Ka MTDC ka dawa ruh ba ki aplikeshon ki dei ban long ha ki katto katne ki phorm bad kumta ban lait na ka jingpynkylla ïa baroh kita ki 6-7 ki aiñ ban pynrung ïa ki kyndon jong kane ka aiñ, ngi la buh ïa kane ka kyndon ha kane ka aiñ ban pynduh ïa kita ki kyndon ha kita ki aiñ bad ki bor ba kongsan jong ka ki long kiba kyrpang bha ïa ki phorm aplikeshon ba ju pyndonkam bad kim shym la ïaid palat ïa kata nga shu kwah ban pynshai ïa kata hynrei namarba ka la wanrah ka jingklumar ha ka District Council bad ïa ki kynhun bad ki paidbah, ka Sorkar ka la rai ban weng noh ïa ka kyndon ne ka para 34 jong kane ka aiñ, kaba pynmih ïa kane ka jingkulmar,” la ong u Sangma.
Haba pynpaw ba ïa kane ka aiñ la mynjur ban pynsuk ïa ka rukom bei tyngka ha ka jylla Meghalaya, u Sangma u la ong, “nga la pynshai ha ki por ba ladep ba ka ju don ka Single Window Agency (SWA), kaba ju pynïaid ïa ki projek bei tyngka bapher bapher ha ka jylla hynrei namar ka jingbun ki bynta, kaba kynthup ruh mynta ka sngi ïa ka tnad ka Koit ka Khiah, ka tnad Rep, ka tnad Jngohkai Pyrthei, ka IT, ka tnad Bording bad ka tnad Karkhana, ka lynti jong ka jingbei tyngka ka la nang ïar bad kumta, ngi la donkam ïa ka bor kaba kham heh ban peit bniah ïa kane ka bynta bad dei kata kaba la pynlong ïa ka jingthaw ïa ka Investment Meghalaya Agency (IMA) ha kata ka por. Bad ïa ka Aiñ la ai jingmynjur.”
U la bteng biang da kaba ong, “mynta ngi pynbeit thymmai ïa kiwei pat ki kyndon kiba don ha ka SWA, ka polisi pynroi ne ka aiñ jngohkai pyrthei ne kiwei kiwei ki aiñ , kiba la shah ktah ha kane, ngin sa leh ïa ki jingpynbeit thymmai kiba donkam bad ban weng noh ïa kane ka Para 34 ban lait na kino kino ki kynrum kynram hapdeng ki paidbah khnang ba kane ka aiñ kan ym ktah ïa ka Meghalaya Land Transfer Regulation Act, 1971.”
“Ngi la buh kyrpang ïa kata ka kyndon ban lait na kano kano ka jingkynrum kynram hapdeng ki paidbah namar ngi sngewba ka la don ka jingkulmar halor kane hadien ba ka District Council bad u CEM ki la kdew ïa kane ha ngi bad kumta ngi la weng noh ïa ka Para 34 khnang ba ka aiñ kan ym ktah ïa ka Meghalaya Land Transfer Regulation Act, 1971.”
Halor ka jingsngewkhia ha kaba ïadei bad ka Para 13 jong kane ka aiñ, u Sangma u la ong, “ka don ka paragraph kaba kyrpang kaba la kdew ba hangno hangno ba ki phorm bad ki bailutksan kiba hap ban buh na ka bynta ki jingpynkhuid ha kino kino ki aiñ pdeng, ïa ki aplikeshon dei ban aiti sha ka Sorkar Pdeng. Kumta khnang ban pynthikna ba ngi shimkhia ïa ki jingeh jong ka KHADC bad kiwei kiwei ki kynhun ngi la pynrung sa kawei ka Paragraph kaba ong ïa kino kino ki phorm bad ki jingsiew ba la kdew na ka bynta ban ïoh jingbit na ki ADC, ïa ki aplikeshon yn ai tang ha kata ka phorm hi ryngkat bad ki jingsiew ba dei ban ai.”
“Ka jingbit na ki District Council hap ban pan na ki District Council. Namarba ka la don ka kynrum kynram ha kaba ïadei bad kata, ngi pynrung ïa kane ka Paragraph bakyrpang bha ban pynshai ba ki jingpan jingbit, ki jingbit, baroh ki NOC kano kano kaba donkam na ki ADC, kin don ban shim lyngba ki ADC bad yn hap ban aplai ïa ki phorm ba kyrpang sha ki ADC bapher bapher, kiba ka la long ha ka jingshisha ki rukom treikam,” u la ong bad bynrap “ngi kwah ban weng ïa ka jingkulmar jingmut khnang ba ym don mano mano ba sngewthuh bakla ba ka jingkylli ban ïaid lait ïa ki ADC kan ym mih na ka bynta kino kino ki jait jingbit kiba donkam da kine ki tnad bei tyngka.”
Shuh shuh u Myntri Rangbah u la ong ba ka Sorkar ka la kynthup ruh sa kawei ka Paragraph ha kane ka aiñ, kaba ïadei bad ka jingpynrungkam ïa ki trai shnong trai muluk.
“Ka Section 2 (a) ka ong: “hapoh ka jingpynïaid bad ki nongpeit ba pura jong ka Sorkar, ki bor synshar kin ai ïa ki jingbthah ba pura jong ka polisi bad ki jingbthah katkum kane ka aiñ” nangta ngi la pyndap “ba ïa ki jingsiew hapoh ki polisi yn ai sha ki karkhana, kiba plie ïa ki lad aikam aijam ïa ki trai ri (ki riewshimet, kiba dei ki nongshong shnong jong ka Meghalaya).
Ngi la bynrap ïa kane khnang ban pynthikna ba ki briew jong ngi kin ïohkam, u la bynrap.
