Shillong, Naiwieng, 19: Ka Ranger Security and Services Organisation (RSSO) ka la pyntip ba ka la weng kam ïa u Parman M. Sangma uba dei u dkhot jong kane ka Organisation uba trei kum u Security Guard ha NEIGRIHMS Hospital hadien ka jingtynrah da ka kali, hapdeng ka jingshoh khawyiang, ïa ki arngut ki samla pule ka Department of Chemistry ka skulbah NEHU ha ka janmiet 17 tarik, Naiwieng, 2025 kiba la tip kyrteng kum ka samla Daritngen Pohdukhei bad ka samla Stephanie Shadap kiba dang don mynta hapdeng ka jingshah sumar ha Intensive Care Unit, ka Nazareth Hospital.
U Assistant Security Officer jong ka RSSO Bah Questerwell Kharsahnoh ha ka jingïakren bad ki lad pathai khubor ha ka sngi Balang u la ong ruh ba kane ka dei ka jingjia kaba sngewsih bad u la phah ruh ïa u kyrwoh sngewlem sha ki arngut ki samla pule ba kin ïoh noh kham kloi ïa ka met ba koit ba khiah.
“Ngi pynpaw ïa ka jingsngewsih sngewdiaw halor kato ka jingjia. Ngim lah ban ong kumno kumno ruh namarba ngim lah ban poi pyrkhat ba kato ka jingjia kan jia haduh katto katto,” ula ong.
“U Parman M. Sangma u dei u nongtrei jong ngi bad ha kato ka sngi um don ha ka kamram (off duty). Na ka liang jong ngi, ngi la maham jur ïa kiwei ruh ki nongtrei jong ka Organisation ba kin ym don bynta ha ka jingdih buaid,” u la bynrap.
“Ngin pynthikna ba kum kine ki jingjia kim dei shuh ban dang jia nangne shakhmat. Kum ka Organisation ngi la shim ïa ka sienjam ba tyngeh ïa ki nongtrei jong ngi kiba don bynta ha ki jingmlien kiba sniew,” u la ong shuh shuh.
“Ngi la shim ïa ka sienjam ba tyngeh bad ngi la wengkam ïa u shisyndon na ka Organisation namarba ki kyndon treikam jong ngi ruh ki la don lypa kiba la mana ba ym bit ban pyndonkam ïa ki jingdih pynbuaid wat naduh u sikret ruh ngim shah,” la ong u Bah Kharsahnoh.
