Shillong, Naiwieng, 24: Ka Meghalaya ASHA Worker Union (MAWU) kaba la ïakhih da kaba sangeh treikam mynta la lai taiew tam namar ka jingmynthi jong ka Sorkar Jylla ïa ki mat jingdawa, ha ka sngi Thohdieng ka la shim ïa ka rai ban pynkut noh ïa ki jingïakhih bad ban leit phai biang ki kam ki jam ba ki ju trei baroh shikatta.
Ïa kane ka rai ki ASHA ki la shim ha ka jingïalang jong ka Executive Committee.
Ha ka jingïakren bad ki lad pathai khubor ka President jong ka MAWU ka Kong Mirajune Myrsing ka la ïathuh ba ha ka jingïalang da kawei ka sur la rai ban leit phai biang sha ki kam ba ki ju trei baroh shikatta bad ka la pyntip ruh ba ki la weng ïa ka jingïakhih kaba la thmu ban pynlong ha ka 27 tarik mynta u bnai.
Ka tnat ka Koit ka Khiah jong ka Sorkar Jylla dang shen ka la rai ban pynkiew ïa ka Fixed Incentive jong ki nongtrei ASHA na ka T. 2000 sha ka T. 3000 hapoh ka skhim ba thymmai kaba la tip kum ka Community Based Health Incentive Scheme (CBHIS) na ka bynta ki nongtrei ASHA.
Ïa kane ka rai la shim ha ka jingïalang ba la pynïaid da ka Myntri ka Koit ka Khiah ka Dr. Ampareen Lyngdoh, ryngkat ka jingdonlang jong ki heh ophisar ka tnat ka Koit ka Khiah bad ki nongïalam ka Meghalaya ASHA Workers’ Union ha Main Secretariat, Shillong.
Hapoh kane ka skhim, ki Village Health Council (VHC) ba la khlieh da ki Rangbah Shnong ha ki shnong bapher bapher kin kitkhlieh ban bishar bad ban kheiñ ban diah ïa ka jingtreikam jong ki ASHA ha kaba pyndep ïa ki kam jong ka koit ka khiah.
Ka Myntri ka Koit ka Khiah la pyntip ba u Myntri Rangbah ka Jylla u Conrad K. Sangma u la mynjur ba yn siew tam sa T. 1000 bad ban kheiñ lang ïa ka jingsiew kaba T.2 hajar ka Fixed Incentive na ka Sorkar Jylla.
