Shillong, Nailur, 15 : U Superintendent of Police ka East Khasi Hills Bah Vivek Syiem ha ka Lah Sngi u Blei u la pynmih da ka jingbthah ïa baroh ki YouTubers bad ïa ki riewpaidbah ba ki dei ban weng noh mardor ïa ka lyngkhot video bad ïa ki dur ba la pynsaphriang ha ka Social Medïa ïa ka metïap jong i heprit Insaphira Lyngdoh Mawnai iba la jah rngai na ka shnong Nongrah ha ka 14 tarik, Nailur, 2025 ha kaba ïa ka met jong i la lap ha ka 15 tarik, Nailur, 2025.
U SP u la ong ba ka jingtohkit jong ki Pulit halor kane ka jingjia ka dang ïaid shakhmat.
U la ong ruh ba kum kine ki jingleh ba khlem da pyrkhat ka la ktah haduh katta katta ïa ki bahaing hasem jong i lanot bad ïa ka imlang sahlang baroh kawei kaba pynpaw ba kim don satia ka jingburom ïa i lanot bad ïa ka iing ka sem.
Ha kaba ïadei bad kane, u la kyntu ïa ki riewpaidbah bad ïa kiwei kiwei ba kim dei ban thep ïa ki video bad ïa ki dur ha ka rynsan Social Media, ne buh Status ha WhatsApp hynrei ki dei ban weng noh bad ban pyndam mardor ïa ki video bad ïa ki dur kiba ladep ban pynsaphriang.
U SP u la maham ïa kino kino ki bym kohnguh ïa kane ka jingbthah kin ngat ha ka jingshah pynshitom katkum ki kyndon jong ka aiñ la ka long pyrshah ïa ki riewshimet, ki kynhun bad ïa ki Youtuber.
