Jowai, Rymphang, 11: Ka Dorbar Shnong Mukroh Pyllun ka la pynbna ba ka la weng noh ïa ka rai ban ym ïashim bynta (boycott) ïa ka elekshon sha ka Jaiñtia Hills Autonomous District Concil (JHADC) ka ban sa long ha ka 21 tarik, Rymphang, 2025.
Kum ban shu pynkynmaw, ka Dorbar Shnong Mukroh Pyllun ka la shim ïa ka rai ban ym ïashim bynta ha ka elekshon sha ka JHADC kaba la long ha ka 9 tarik, Kyllalyngkot, 2025 halor ka nongrim ba ka Sorkar MDA-II ba la ïalam da ka National People’s Party (NPP) ka la leh kuman ïa ki jingeh bad ki jingshah leh donbor jong ka shnong ha ka Karbi Anglong Autonomous Council (KAAC), Assam.
Hadien, ba ki nongïalam jong ka Dorbar Shnong Mukroh Pyllun ki la aiti ïa ka shithi sha u Deputy Commissioner jong ka West Jaiñtia Hills District u Bah BS Sohliya ha ka 10 tarik, Kyllalyngkot, 2025 ka la don ruh ka jingpyrshang na ka liang jong ka Sorkar Jylla ban bthah ïa ki bor synshar jong ka West Jaiñtia Hills District ban ïakren pynbeit bad ki bor synshar shnong jong ka Dorbar Shnong Mukroh Pyllun.
Dei ha ka sngi Baar mynta ka taiew ki bor synshar jong ka West Jaiñtia Hills ba la lamkhmat da u Executive Magistrate u Bah G.H Passah, u la hiar sha ka shnong Mukroh bad ha ka dorbar pyllun ba la ïashim bynta lang da ki paidbah nongshong shnong u la kyrpad ba kin weng noh ïa ka rai ba ki la shim.
Da ka jingkular jong u Executive Magistrate lyngba ka jingthoh, kata, ban buh noh ïa ka Border Police Outpost (BOP) ha ka jaka ba ka shnong ka la kdew bad la kular ruh ban weng noh ïa ki jingeh kiba ka shnong bad ladep pynmih ruh ïa ka jingpynbna lyngba u Deputy Commissioner jong ka West Jaiñtia Hills District ban sa pynlong biang ïa ka jingïalang na ka bynta ïakren shuh shuh ïa ki jingeh jong ka shnong Mukroh ka ban sa long ha ka 26 tarik mynta u bnai ha ka shnong Mukroh.
Halor kine ki jingkular lyngba ki jingthoh, ka Dorbar Shnong Mukroh Pyllun da kawei ka sur jong ki paidbah la mynjur ban weng noh ïa ka rai ban ym ïashim bynta ha ka elekshon sha ka JHADC.
