Shillong, Jymmang, 21: Ki runar ki bym lah ban ithuh durkhmat ha ka sngi Balang ha ka por kumba 1:30 baje haduh 1.45 baje mynstep ki la wiang ding ïa ka dukan jong ka Kong Angina Ora kaba don ha ka shnong Jaïaw Umpohliew, Shillong.
Ka Kong Angina Ora bad ka hymmen ka Dr. Midiana Ora ha ka jingïakren bad u nonglum khubor ki la ïathuh ba ki runar kim shym la rong tuh satia ïa ki mar ki mata hynrei la shu wiang da ka ding ïa ka dukan baroh kawei.
Namarba ka dukan ka don hapoh jong ka iing, ka Kong Angina Ora bad ki bahaing hasem ki la ong ba kane ka jingleh dusmon jong ki runar ka long beit kum ka jingthmu pynïap wat ïa ki briew kiba dang ïohthiah hapoh ka iing.
Halor kane ka jingjia, watla na ka liang jong ka ïing ka sem kim shym la ujor satia sha ki Pulit, hynrei ki bor pynïaid jong ka shnong Jaïaw Umpohliew ki la rai ban pynlong noh da ka jingap pahara shnong manla ka miet khnang ban ïada ïa kino kino ki jingjia ba sngewsih ïa ki nongshong shnong nangne shakhmat.
