Shillong, Nailur 18: U General Secretary ka United Democratic Party (UDP) u Bah Titosstarwell Chyne ha ka sngi Palei u la kyntait ïa ki jingkynnoh ba ka don ka jingïakynad hapoh jong ka party halor ka rai ban pynhab shuki noh ïa u MLA ka West Shillong u Bah Paul Lyngdoh bad u MLA ka Khliehriat u Bah Kyrmen Shylla na ka kam Myntri jong ki ha kane ka sorkar MDA-02.
Katkum ka jingong jong u, kam shym la don ka jingïamynjur kaba neh halor ka samoi jong ka jinglong Myntri hapoh ka sorkar.
Haba kren sha ki lad pathai khubor, u Bah Chyne u la ong ba ka rai ban pynhiar shuki ïa ki Myntri kadei na ka daw ka jingkylla ha ka kam saiñ hima sima.
“Haba kaba sdang kam shym la don ka jingïamynjur hynrei na ka jingmih ki jinglong jingman ha ka saiñ pyrthei bad naba kam don uta u full stop ha ka politik. Ka politik ka lah ban kylla ha kano kano ka por. Kumta ngi khlem pynthikna ba ka don ka jingïamynjur ne kano kano ka jingmynjur kaba kum kane ba kan don ka jingtreikam kaba pura ne kaba arsnem shiteng hynrei kane ka la jia na ka daw ka jinglong jingman ha ka saiñ hima sima,” u la ong da kaba bynrap, “Ngim don kano kano ka jingïashrut hapoh ka party.”
Lah ban pynkynmaw ba ïa u Bah Paul bad u Bah Kyrmen la bujli noh da u President ka UDP u Bah Metbah Lyngdoh bad u Bah Lahkmen Rymbui.
Haba kylli, u Bah Chyne u la ong ba kine ki Myntri kiba la shah pynhiar shuki ki khlem pynpaw ïa kano kano ka jingbym sngewhun ha ka por ka jingïalang bad baroh ki MLA ka seng. U la bynrap ba ka rai ki nongïalam ka party la leh hadien ka jingïasyllok lang jong baroh ki nongtrei jong ka seng, da kaba pynthikna ba baroh ki MLA ki dei ban don bynta ha kane ka kam. “Ha shwa ban shim ïa ka rai, na ka liang u president u la dep ban ïasyllok ia iwei pa iwei i dkhot haba ïadei bad kane ka kam,”
Haba ïada ïa ka jingïoh long Myntri u Bah Metbah hapoh ka kynhun Myntri ka sorkar, u Bah Chyne u la ong, “Kane kam dei ka sien kaba nyngkong ba u president un ïoh ïa ka shuki Myntri sorkar. Ha ka por u (L) Dr Donkupar Roy kumjuh u la long u president bad u la donlang ruh hapoh ka kynhun Myntri sorkar. U la long u Symbud Myntri Rangbah ha kato ka por. U Dr. Donkupar u la long u deputy CM bad u la long ruh ha kajuh ka por u president ha kato ka por. U la pyndep pura ïa ka kam kum u president bad kumjuh ruh u la pyndep ïa ka kam kum u Myntri Sorkar. U Conrad K Sangma u dei u national president ka NPP. Kumta haei kan don ka jingbakla hangne? Hato phi ïohi ba u Conrad K Sangma um lah ban pynïaid bad pyntyllun ïa ki kam jong ka party? U la pyntyllun bha ïa ki kam jong ka party jong u.”
Ha kajuh ka por kum u General Secretary ba dang shah jied thymmai, u Bah Chyne u la pynpaw ba ka party ka la pyrkhat bun ki kam ban pynkhlaiñ ïa ka seng naduh ki tynrai jong ka.
Ka party kan pynlong ïa ki district-level meeting bad kan pynkhlaiñ ïa ki thapniang jong ka, kynthup ruh ïa ki seng longkmie, ki seng samla, ka seng ki nongrep khnang ba ka party kan kiew bad ban neh haduh bakut.
