Shillong, Nailar, 14: Ka Hynñiewtrep Border Dispute Redressal Forum (HBDRF) ka la kam ba ka Sorkar Meghalaya kam shym la aibor satia ïa ki Pulit kiba la phah pahara ban ai jingïada ïa ki paidbah ka shnong Lapangap, West Jaiñtia Hills District.
Ha ka jingïakren bad ki lad pathai khubor ha ka sngi Palei, u Chairman jong ka Forum u Bah Chandame Sungoh u la ong, “tang ïa ki Pulit kiba (ka Sorkar ka la phah pahara) ha Lapangap ruh kam shym la aibor ba kin leit pahara ïa ki paidbah nongshong shnong ka Lapangap ba kin leit trei leit ktah sha ki bri ki lyngkha jong ki. Kim (Sorkar) ai bor ba kin leit sha ki jaka rep.”
“Ki jaka rep jong ki (nongshong shnong ka Lapangap), ki don sha ki shnong Karbi. Ka jingtip ba nga ïoh ka long ba ki Pulit ka Meghalaya ki telephone ïa ki Pulit ka Assam ba kin ai jingpahara ïa ki briew jong ngi kiba leit sha ki jaka rep. Hynrei ki Pulit Assam ki aidaw ba kim lah ban ai jingïada namarba ki Karbi ki dang ieng pyrshah,” la ïathuh u Bah Sungoh.
Halor ka jingsieh ïa ki lama iong ha ka shnong Lapangap, u Bah Sungoh u la ong, ‘ngi dap da ka jingsngew khia namarba ka jingrakhe ïa ka sngi laitluid jong ka ri ruh ka la jan. Ka long kumba pyrshah India, hynrei lada pyrkhat pat ïa ki jingeh ba ki paid jong ki ïakynduh jingeh ha khappud ngi long ki lanot ha ka synshar paidbah.”
“Bunsien nga ju kren ‘ngi dei ki mraw jong ka synshar paidbah’ namarba katkum ka riti synshar jong ka ri India ka ailut baroh ki hok jong ki nongshong shnong khamtam ïa ngi ki jaidbynriew Scheduled Tribe hynrei kumba ka long mynta, i kumba ka riti synshar ka ai ïa ka hok tang ïa kiwei pat ki kynhun jaidbynriew,” la kynthoh u Chairman ka Forum.
“Kumba ngi ju ong barabor ba ïa ka ri jong ngi la rahbor, ïa ki briew jong ngi la ring mraw noh, ngi long kum ki lanot jong ka synshar paidbah. Khnang ban lait na kine ki jingpyrshah sorkar, ka Sorkar ka dei ban wanrah ïa ka shongsuk shongsaiñ bad ka dei ban pynïoh ïa ka hok jong kito ki nongshong shnong sha khappud,” u la bynrap.
U la kam ba ka jaka ba ki paidbah ka Lapangap ki la pynpra ïa ki jingtei ki Karbi mynta la shna ktem da ki Pulit Assam.
U la ong ruh ba ki Pulit ba la phah da ka Sorkar Meghalaya ki sah beit ha ka shnong Lapangap namarba ka Sorkar kam ai hukum ban leit sha ki jaka rep jong ki nongshong shnong.
“Ka jingleit jong ki sha Lapangap ka long kumba shu leit shongkai, ban leit pahara ruh kim leit. Ka jaka kaba ngi la dawa ban buh (ïa ki Pulit ruh) kim buh, ki sah beit hapoh shnong,” u la ong.
“Ym dei ba nga pynrem hynrei ngi ïohi shai ïa kata, kane ka jingpyndem tdong ne ka jingbym leh eiei ka Sorkar ka pynlong ïa ngi ki nongïalam barit baria bad ïa kiba don ha ki kyrdan kiba kham halor ban duh jingshaniah. Ki Magistrate, ki Addl. DC da ki leit shatei (Lapangap) u paidbah um burom shuh namarba kim lah ban leh eiei, kim lah ban pynsangeh ïa ka jingkyntur pud, kim lah ban pynsangeh ïa ki jingeh jong u Assam. Wat ïa ngi ki nongïalam ruh ki duh jingshaniah bad ki ong ba katto phi la leit sha ka Sorkar ruh phim lah ban leh eiei,” la kren bynñiaw u Bah Sungoh.
“Ïa kane la sakhi shai ba ka Sorkar Meghalaya ka la pyndem tdong da shisha,” la kynthoh shuh shuh u Chairman ka Forum.
