Shillong, Nailar, 14: Ka Hynñiewtrep Border Dispute Redressal Forum (HBDRF) ha ka sngi Palei ka la dawa ïa ka Sorkar Meghalaya ba kan ai jingithuh noh ïa ki 59 tylli ki shnong kiba hap hapoh ka Elaka Labang-Nangphyllut, West Jaiñtia Hills District.
Kane ka jingdawa jong ka Forum ka long hadien ba ka Jaiñtia Hills Autonomous District Council (JHADC) ka la ai jingithuh ïa ka Elaka Labang-Nongphyllut da kaba thung ïa u Acting Dolloi u Bah Bah Prolin Samayang bad aiti ruh ïa ki Sanad sha ki Waheh Shnong jong ki shnong kiba hap hapoh ka Elaka katkum ka jingpynbna ba la pynmih ha ka 27 tarik, Jylliew, 2024 hapoh ka Section 26 jong ka Establishment of Elaka/Sirdar and Waheh Chnong Act, 2015.
Ki Raid kiba hap hapoh ka Elaka Labang-Nangphyllut ki long ka Nongjrong, ka Labang bad ka Nangphyllut.
U Chairman jong ka Forum u Bah Chandame Sungoh ha ka jingïakren bad ki lad pathai khubor hadien ka jingaiti ïa ka dorkhas ha u Chief Secretary ka Jylla u Bah Donald P. Wahlang u la ong, ka jingai jingithuh jong ka District Council ïa ka Elaka Labang Nangphyllut ka long da kaba pynshong nongrim na ka Joint Enquiry Proceedings jong ka United Cachar & Mikir Hills District Council bad ka United Khasi & Jaiñtia Hills District Council kaba la long ha ka 17 tarik haduh ka 24 tarik, Rymphang, 1958 katkum ka jingpynbna ba la pynmih da ka Sorkar Assam ha ka 5 tarik, Naiwieng, 1958.
“Kumba ka long mynta, ki paid jong ngi kiba don sha Block-I palat 36 tylli ki shnong kim pat don ïa ka EPIC, Aadhaar Card bad kiwei kiwei ki dulir ba donkam,” la ong u Bah Sungoh.
“Kane ka jingbym don ïa ka EPIC, Aadhaar Card ka buh jingeh bha khamtam mynta ba la buh ki khynnah kiba pule ki hap ban pep skul bad ki samla kiba angnud ban bteng ïa ki jingpule ha ki College bad ki University ruh kim ïoh lad shuh namarba kim don ïa ki dulir bad kane ka pynduh wat ïa ka hok ban thep kam thepjam,” u la bynrap.
“Wat kiba leit bylla ruh ki hap ban pep namarba bun na ki shnong ki thaw ki pan ïa ka EPIC bad kiwei kiwei ki kot ki sla bad kane ka dei ka daw kaba pynlong ïa ngi ban ai da ka jingthoh sha ka Sorkar ba kan ithuh bad ban pynrung ïa ki shnong kiba ladep pynbna bad ai jingithuh da ka JHADC,” ong u Bah Sungoh.
Haba kylli, ula ong, “ngi sngewkhia bha haduh katta katta ïa ka jingleh klet ka sorkar jong ngi ha kaba ïadei bad ka kam khappud namarba kumba ka long mynta ha ki bnai baladep kumba jia ha ka shnong Mukroh kumba ngi la sakhi bad kaei kaba la jia ha ka shnong Lapangap. Dang hynnin mynmiet nga dang ïoh jingtip na u Waheh Shnong ka Lapangap ba ki nongshong shnong kim pat nud ban leit thung kba.”
“Ka por (thung kba) mynta ka la dier, wat ïa u kba ladep thung ruh kim nud shuh ban leit peit,” u la bynrap.
“Nga ladep ïakren ïa u Deputy Commissioner, ïa u Border Magistrate bad ïa u Superintendent of Police ka West Jaiñtia Hills ki la ong ïa nga ba ki ladep ban phah ïa ka kaiphod sha ka Sorkar Jylla,” la ïathuh u Bah Sungoh.
