Shillong, Rymphang 29: Hadien ba la kut ka jingai por kaba 15 sngi, ki dkhot jong ka Khasi Students Union (KSU) Laban Circle ha ka step sngi palei ka 29 tarik Rymphang ki la mih ban shna ïing ia ki para Khasi ha Maxwelton Estate, hadien ba kiwei ki jaitbynriew ki la ioh ban buhai shnong ha kane ka jaka kaba dang hap hapoh ka South Shillong Constituency.
Ka KSU Laban Circle dang shen ka la ai por ba ki briew kiba sah beain ha Maxwelton estate ba ki dei ban mih noh mardor namar ba ka dei ka jaka sorkar, bad ka seng ka la ujor ruh sha ki bor synshar district hynrei kam shym la ioh satia ia ka jubab.
Mynta ka sngi, ha ka por 7 baje mynstep, ki dkhot ka KSU ki la ia mih ryngkat ki tiar ki tar ban shna ing ia ki para Khasi ba kin sah ha Maxwelton Estate ka jaka kaba la sah da kiwei ki jaitbynriew.
Dang shen, u Symbud Myntri Rangbah ka Jylla uba khmih ia ka tnat Kam Pohiing u Bah Prestone Tynsong ula ong ba kane ka jaka ka dei kaba dang don hapoh ka jingialeh mukotduma ha ingbishar.
