Shillong, Rymphang, 26: U Myntri Khynnah ka Sorkar Pdeng uba khmih ïa ka Ministry of Education u Dr. Sukanta Majumdar ha ka sngi Balang u la kular ban weng ïa ki jingeh kiba dang ïai bteng haduh mynta hapoh ka skulbah North Eastern Hill University (NEHU).
Ha ka jingïakren bad ki lad pathai khubor u Dr Majumdar u la ong, “ngi dang ïai peit ïa kane bad ngi kwah ban pynduna ïa ki jingeh bad nga kyrmen ba ngin sa lah ban pynduna ïa ki jingeh kaba ki samla pule ki ladep mad bad ka Ministry ka la ïakren bad ki bor pynïaid halor kine ki jingjia bad ngin sa lah ban weng noh shen.”
Haba jubab ïa ka jingkylli halor ka jingdawa ban weng noh ïa u Vice Chancellor ka NEHU u Prof. PS Shukla, u Myntri Khynnah u la ong ba ka skulbah NEHU ka dei kaba treikam laitluid bad ki don ki kyndon kiba ïadei bad ka jingthung ïa u vice chancellor.
“Namarkata, phim lah ban kylliang ïa u VC tang namarba ka don ka jingdawa. Kam lah ban long hynrei ka Sorkar India ka ju ïakren bad ki ophisar (bad ïa ki bor pynïaid jong ka skulbah),” u la bynrap.
