Shillong, Rymphang, 15: U Senior Vice President jong ka Hill State Peoples Democratic Party (HSPDP) u Bah Martle N. Mukhim uba long ruh u President jong ka HSPDP, Mawkynrew Constituency u la pynshai paidbah ha ka sngi Saitjaiñ ba ka jingbym ïakhun shuh ïa ka elekshon ha kane ka kynti sha ka Khasi Hills Autonomous District Council (KHADC) ka ban sa long shen, ka dei namarba u don hapdeng ka jingbym khlaiñ jong ka bormet.
Haba pynshai ïa ka jingshah kynthoh ba ka jingbymïakhun jong u ïa ka elekshon MDC ka dei namarba u la leit ban pynïasoh sha ka United Democratic Party (UDP) u Bah Martle u la ong, “ha ka jingïakynduh ïa ki katto katne ki nongïalam jong HSPDP Mawkynrew Circle. Nga don hapdeng ka jingshitom, shibun ki jingjia ki la jia ha ka jingïaid lynti jong nga ha kaba ïadei bad kane ka elekshon MDC naduh ka por ba ngam sngewlah shuh ban ïaleh ïa kane ka elekshon, ngi la ïapyrkhat katto katne ban ïoh (sei bujli) ïa u kyrtong.”
“Hynrei hapdeng ki jingpang, ym poi sha ka jingïasngewthuh jingmut. Namarba ym poi ha ka jingïasngewthuh jingmut baroh ki riewrangbah da kawei ka jingmut ki la rai ban aiti sha ka Central Body ba kan leh ïa kaba donkam ha kaba ïadei bad ka jingjied ïa u kyrtong,” la ong u Bah Mukhim.
“Ha ka jingshisha ym dei ban sngewthuh bakla ka dei hi kaba la leh da ka party bad ma nga uba haduh mynta nga dang dei u President jong ka Mawkynrew Circle bad u Senior Vice President ka HSPDP,” u la ong.
U la ïathuh ba ka party ka la ibit ïa u Bah Tourist Syiem ban long u kyrtong jong ka HSPDP na Mawkynrew Constituency.
“Ym lah ban ong kumno kumno ruh ïa ka jingshim kabu jong ka pyrthei ha kaba ïadei bad ka kam party namarba ki don kiba ong ba nga la pynïasoh sha ka UDP bad kata ka long kaba bakla shikatdei eh,” la pynshai u Bah Mukhim.
U la kyntait war ruh ïa ka jingkynnoh ba u la kynshoit ïa ki nongkyrshan ka HSPDP ban leit ai jingkyrshan noh ïa ki kyrtong jong kiwei pat ki party. “Kam dei kumta, nga kren hok. Namarba nga don hapdeng ka jingpang, nga khlem lah ban lum ïa ka jingïasngewthuh jingmut kawei hapoh ka Circle kumta nga shu ieh ha ka jingpynïaid jong ka Central Body ka party baroh kawei. Kumta ka party ka la rai ban jied ïa u Bah Tourist kum u kyrtong ka party,” bynrap u Bah Martle Mukhim.
“Une u (Bah Tourist) dei u Official Candidate uba ngam lah ban ong ba ngam ïadonkti namarba la phah hi (ïa ka kyrteng jong u) da ka Circle sha ka party ba kan leh ïa kaba donkam,” la pynshai shuh shuh u Bah Mukhim.
“Nga ieh ha ka jingstad jong ki nongthep vote ba kim dei ban pdiang ïa ka jingong jongno jongno ba ngam dei shuh u briew jong ka party lane u nongïalam jong kawei pat ka party hynrei nga dang dei hi u nongïalam ka HSPDP bad ha kajuh ka por namarba nga don hapdeng ka jingpang bun ki kam kiba nga la hap ban kiar namarba ka long shabar na ka jinglah jong nga ym dei ba nga kiar na kano kano ka daw hynrei nga kiar namarba ka jingpang kam ailad ïa nga ban pyrkhat na ka bynta ban trei ban ktah. Nga ieh ïa ka jingstad jong ki briew bad ka Constituency bad ki nongkyrshan jong ka party,” la pynshai u Bah Mukhim.
