Shillong, Naitung, 30: Ka Meghalaya State Co-ordination Committee of Coal Owners, Miners, Exporters, Transporters and Dealers Forum (COMETDF) ha ka sngi Baar ka la kyntu ïa ka Sorkar Meghalaya Democratic Alliance (MDA) ba la lamkhmat da ka National Peoples Party (NPP) ba kan khmih bniah biang halor ka Standard Operating Procedures (SOP) kaba ïadei bad ka jingtih dewïong katkum kane ka juk stad saïan ba mynta.
U dkhot jong ka (COMETDF) Bah Regeenald Shylla ha ka jingïakren bad ki lad pathai khubor u la ong, “ha ka jingïakren halor ka jingtih dewïong katkum ka juk stad saïan ha Meghalaya ngi la wad bun ki lad ki lynti bad ngi la pynlong ruh ka jingtih bniah khnang ban ïoh pyntreikam noh ïa ka jingtih dewïong katkum ka juk stad saïan.”
Ka SOP ba la pynmih da ka Sorkar MDA ha ka 5 tarik, Lber, 2021 ha ka sla 83 ka kdew shai ba kiba aplai ïa ka Mining Lease ki dei ban don ïa ka par dewïong kaba heh 100 hectare
“Katkum ba la kdew da ka Sorkar Jylla ban aplai ïa ka Mining Lease ym dei satia ban duna wat shi inshi ruh jingheh ka par dewïong na ka 100 hectare. Kane ka la teh la khum ïa ki paidbah ha baroh kawei ka jylla Meghalaya kiba im kamai jakpoh na kane ka kam,” u la ong.
“Lyngba ka jingkyrshan jong ka seng nga la phah da ka jingthoh sha u Myntri Rangbah ka Jylla u Conrad K. Sangma uba peit ruh ïa ka tnat Mining and Geology ha ka 2 tarik, Naitung, 2024 da ka jingkyrpad ïa ka Sorkar ban ban weng noh ïa ka 100 hectare bad ban khmih bniah biang ïa ka Standard Operating Procedures (SOP) bad ban wad ïa ki lad ki lynti lyngba ki Legal Expert bad ki Environmental Expert ban pynduna noh na ka 100 hectare ïa ka jingtih dewïong na ki par dewïong,” la ïathuh u Ba Shylla.
“Lada ka Sorkar kam lah ban pynduna ïa ka 100 hectare ka dei ban phah wad bniah da kaba thaw ïa ka Expert Committee ka ban wad bniah ha ka jylla Nagaland bad Assam ba kumno ki pyntrei ïa ka jingtih dewïong lyngba ka Article 371 namarba ha ka jylla Nagaland lyngba ka Article 371 (A) la pyntrei ïa ka jingtih dewïong hapoh ka jaka ba heh tang 2 hectare bad ha ki katto katne ki jaka ha ka jylla Assam kum ha Dima Hasao, Tinsukia, Barpeta kumba long hi ha Meghalaya,” la kyntu u Bah Shylla.
U la pynpaw ruh ba ka Sorkar MDA kam shym la shimkhia ïa ka jingud jingnam jong ka seng hadien ba ka National Green Tribunal (NTG) ka la kheiñ be-aiñ bad khang ïa ka jingtih dewïong thliewkhnai ha kane ka jylla Meghalaya naduh u snem 2014.
Shuh shuh u la ong, namar ka jingbym shimkhia jong ka Sorkar, ka seng ka la shim ïa ka rai ban ïaid shaphrang da kaba pynlong ïa ki jingïalang paidbah ha South West Khasi Hills District, West Khasi Hills District, sha rilum Garo bad dang shen ka seng ka ladep pynlong ruh jingïalang paidbah ha East Jaiñtia Hills.
“Ngi pan jingkyrshan na ki arngut ki MP ka Lok Sabha, kata u Bah Ricky AJ Syngkon bad Saleng Sangma bad na u MP ka Rajya Sabha u Dr. WR Kharlukhi ba kin buddien lem halor kane ka kam na ka Ministry of Coal and Mines ka Sorkar India bad kynthup ruh na ki 60 ngut ki MLA ka Jylla,” la ong shuh shuh u Bah Shylla.
