Shillong, Nailar 28: Ki bahaïing hasem jong u samla Kynjaimon Amse na ka shnong Umkiang East Jaiñtia Hills District uba la khladnoh dang shen, ki la ujor da ka ejahar ha Khliehriat Police Station.
Ka jingujor ujor ejahar ka long halor ka jingbym sngew lah ngeit ïa ka jingkhladnoh jong u samla Kynjaimon Amse ha ka jingjia aksident ha ka miet shiteng synia 23 tarik mynta u bnai.
Katkum ka ejahar ba la soi da u Mama u Bah Lalan.S.Amse u la pynpaw ba kum ki bahaïing hasem kim lah ban pdiang ba ka jingkhlad jong u samla Kynjaimon Amse kan dei na ka jingjia aksident.
“Ngi don ka jingsuba ba ka lah ban don kaei kaei sha lyndet namar haba ngi peit ïa ka kali kaba u shong kam shym don dak mong eiei ha ka liang kaba u shnong bad ka jngjulor ruh ka long tang khyndiat eh,” la pynpaw ki bahaing ha ka dorkhas.
Kum ban shu pynkynmaw, u samla Kynjainmon Amse uba bat kum u Assistant Waheh Shnong jong ka shnong Umkiang, u dei ruh u muktiar ha District & Session Court Khliehriat, East Jaiñtia Hills District bad u dei u samla uba ju don bynta ha kiba ki kam jong ka imlang ka sahlang jong ki paidbah ka East Jaiñtia Hills District khamtam ka jingleh bha ïa ki paidbah jong ka Elaka Narpuh.
