Shillong, K’lyngkot, 20: Ki nongmihkhmat jong ka Asian Football Conferderation (AFC) bad ka All India Football Federation (AIFF) ha ka jingjurip ïa ka madan ïalehkai phutbol ha Jawaharlal Nehru Stadium ha ka Lah Sngi u Blei ki la lap ïa ki katto katne ki jingduna ha kane ka madan ha kaba ki don bynta ba u phlang uba ladep thung u la sdang ban sniew, ka jingjrong jong u dieng goal bad ka jingbym pat biang ka jaka khreh jong ki nongïalehkai bad kiwei kiwei de ki jingdonkam.
Ha kane ka jingjurip ba la lamkhmat da u President jong ka Meghalaya Football Association (MFA) Bah Hamletson Dohling la ïadonlang u Match Commissioner jong ka Asian Football Conferderation (AFC) u Mindu Dorjee bad u Senior Manager u Abhishek Yadav uba dei ruh u Club Licensing and Competitions jong ka All India Football Federation (AIFF).
Ha ka jingïakren bad ki lad pathai khubor, u Bah Hamletson Dohling u la ong ba kane ka jingwan jurip kloi ïa ka madan ka long kaba bha shaba palat namarba ka MFA kan dang ïohlad ban pynbha ïa ki jingduna bad u la pynpaw ruh ïa ka jingkyrmen ba u u Match Commissioner jong ka Asian Football Conferderation (AFC) u Mindu Dorjee un phah ïa ka kaiphod kaba biang sha ka All India Football Federation khnang ba yn dup lah ban pynlong ïa ki lympung ïalehkai phutbol da ka jingkyrshan lang jong ka Sorkar jylla.
Ka jingwan jurip jong kine ki nongmihkhmat jong ka All India Football Federation (AIFF) ka long hadien ba ka la tyrwa sha ka Meghalaya Football Association (MFA) ban pynlong ïa ki artylli ki jingïalehkai bar-ri ne ka International Friendly Match hapdeng ka kynhun ïalehkai ka ri India bad ka Maldives ka ban long ha ka 19 tarik ne 20 tarik, Lber 2025, katba ha ka lympung ïalehkai phutbol jong ka Asian Football Conferderation (AFC) kaba la tip kum ka Asian Qualifying ka jingiakhun kan long hapdeng ka ri India bad ka Ri Bangladesh ka ban sa long ha ka 25 tarik Lber 2025.
