Shillong, Naiwieng, 10: U Superintendent of Police jong ka East Khasi Hills Bah Vivek Syiem u la pyntip ba kam shym la don kano kano ka jingpynbor ban pyllait noh ïa ki nongïalam ba la shah kem jong ka Meghalaya Commercial Truck Owners & Drivers Association (MCTODA).
Ïa ki nongïalam, kiba la kem ha ka jingshah bat ki trok ha surok ka shnong Mawryngkneng, East Khasi Hills District, ki la shah pynngat saw tylli ki mukotduma, kynthup ka jingkawang maw bad ka jingpynjulor ïa ki trok.
Ka rai ban ai jamin ka shong beit ha ka Kashari, la ïathuh u Bah Syiem ha ka jingïakren bad ki lad pathai khubor ha ka Lah Sngi u Blei.
“Ki nongïalam ki dei ki briew kiba don lang ha khmat ha kato ka jingïakhih bad baroh kine ki kam bymman ki la jia hangto, ki dei ki briew kiba ïalam nakhmat nakhmat,” la ong u Bah Syiem bad bynrap ba ka aiñ hi kan sa leh la ka jong ka kamram.
U Bah Syiem u la pynshai u Majistor uba don ha ka kamram u la ai shwa da ka jingmaham ïa ki nongïakhih ba kim dei ban pynwit ïa ka jingïaid jong ki trok, hynrei ki la thaw jingkulmar, bad kane ka la pynlong ruh ïa ki Pulit ban kawut da u lathi.
U SP u la kyntait ïa ka jingkynnoh ba ki Pulit ki la pyndonkam palat pud ïa ka bor, hynrei u la ong ba ka jingpynibor ka long kaba rit bad kaba donkam ban pynneh ïa ka shongsuk shongsaiñ.
“Ïa ki nongïakhih kiba ïalum hangto ka jingshisha u Majistor uba don ha ka kamram u la pyntip kim dei ban khanglad ïa ki trok kiba ïaid lynti bad u la pyntip da kaba shai ba kim dei ban khanglad hynrei watla katta haba ki trok ki la wan bad ngi la ïalam ïa ki, ka la don ka jingkawang kaba jur bha bad ka la don ka jingshah thombor, ka la don ka jingshah rahbor jong uwei u briew bad kaei kaba la jia ka la mih ka jingthombor bad ki pulit kim banse ban kawut lathi malu mala. Kam dei kaba ngi la pynmih ïa kano kano ka kyndon bad ka jingpynibor jong ki Pulit ruh ka la long kaba malu mala,” u la pynpaw.
