Shillong, K’lyngkot, 07: Ka Sorkar Jylla haduh mynta ka dang ap ïa ka jubab na ka Ministry of Defence halor ka jingkyrpad ban ai 2 acre ka jaka na ka bynta ban ïoh pynkynriah noh ïa ki 342 tylli ki longiing na Them Iew Mawlong.
Haba pyntip ïa kane ha ka sngi Baar, u Chief Secretary jong ka Jylla u Bah DP Wahlang u la ong, “kane ka kam mynta ka dang don ha ka kti jong ka Ministry of Defence. Namarkata, ngi khmihlynti ba kin ai jubab noh kham kloi katba lah bad ngi dang ïai ap ba kin phah ktien sha ngi.”
U la pyntip ba ka Sorkar Jylla ka la pynsngew ruh sha ka Sorkar Pdeng ban pan jaka ha Mawlonghat, kaba hap ha ka jaka jong ki shipai
“Ngi la ïakren bad ka Ministry of Defence bad ngi kyrmen ba ngin sa ïoh ïa ka jubab kaba shai halor kata. Ka jaka ba ngi la kyrpad ka dei kaba rit bad kaba biang. Tang shu ïoh jubab na ka Ministry of Defence, ngin sa pyntyllun noh ïa ka kam shakhmat,” ong u Bah Wahlang bad bynrap, “ha ka jingshisha, ha u bnai Nohprah, u Myntri Rangbah bad u Commissioner and Secretary ka tnat Pynroi Sor, ki la leit ban pynsngew ïa kane ka jingthmu sha ka Ministry bad ngi kyrmen ba shen ngin sa ïoh noh ïa ka jubab.”
Haba kylli, u Chief Secretary u la ong, lada la ïoh jaka ha ka jaka jong ki shipai, ka Gurudwara kan ym shah ktah.
“Haoid, ha kato ka por, haba ngi la ïakynduh ar bnai mynshwa ha u bnai Naiwieng, ki (Harijan Panchayat Committee) la mynjur ïa kata bad kumba ngi la ïakren, ka Gurudwara kan ym shah ktah ne yn ym ktah satia ïa ka jaka mane blei. Nga ngeit ba ka la biang lada la ïoh jingmynjur. Ngi la ïakren ruh halor ka jaka kaba 2 akar, ïa kaba lah ban pynduhna ruh sha shi akar shiteng,” u la bynrap shuh shuh.
