Shillong, Nailar, 05: Ka jingwad da ka State Disaster Response Force (SDRF) ïa u ophisar ka ophis Agriculture u Teseng M. Sangma, uba la shah rong ha ka umsaw ha wah Ganol ha ka sngi u Blei ka dang ïai bteng haduh mynta ka sngi Baar naduh ka por 6:30 baje mynstep.
U kyrwoh ba la phah da u Senior Staff Officer & Addl. PRO ka Directorate of Civil Defence & Home Guards, Meghalaya u Bah Paul H. Shylla u la pyntip ba ki Pulit ka kynhun SDRF ki la kham pynleit jingmut ban wad sha ki bynta ba kham sharum jong ka wah ha kshaid Pelga khnang ban lap ïa ka met jong u Sangma.
Hynrei ka jingwad kam shym la seisoh satia bad la hap ban pynsangeh shwa haduh ka por 7:00 baje mynmiet namar ba la prem dum.
Ka jingkhlaiñ jong ki lat lat bad ka jingkiew jongka um ba la pyllait na ka Ganol Hydel Project ha Chibragre ka la buh jingeh ruh wat ïa ka kynhun SDRF kynthup ïa ki Pulit ka tnat Fire & Emergency Services kiba don bynta lang ban wad ïa ka met jong u ophisar.
U Director ka Civil Defence, Meghalaya u MK Sangma, u la shong pyrkhat kam halor kane ha kshaid Pelga bad ïasam ruh ïa ki jingtip bakongsan sha ka kynhun SDRF.
