Shillong, Jylliew, 23: Ka kynhun State Disaster Response Force (SDRF) kiba la bteng ban wad ïa u Sidharth Chhetri, 16 snem ka rta uba la shah rong ha ka umsaw katba u dang jngi ha wah Urkaliar ha ka sngi u Blei.
Une u khynnah u la shah rong ha ka umsaw kaba la wan kynsan na ka jingther jong u slap ha ka sngi u Blei ha wah Urkaliar.
Kat haduh ba la pynmih ïa kane ka khubor ym pat lap satia ïa ka met jong u Sidhrath watla ka kynhun SDRF ki la pyrshang ban wad ha ki bynta jong ka wah Umkhrah hajan ka jingkieng kaba don markhap bad ka ktem sah jong ki CRPF naduh ka sngi U Blei haduh mynta ka Lah Sngi U Blei kaba la neh la 24 kynta.
U Krishna Chhetri uba dei u kpa jong u Sidharth u la ïathuh ba u khun jong u, u la leit jngi bad lai ne saw ngut paralok ha ka Wah Umkaliar hynrei namar ka jingther u slap ka umsaw ka la wan kynsan bad ka la rong ïa u lem bad ïa uwei u paralok.
U ïathuh ba ïa une u paralok la ïoh ban pyllait noh da ki briew kiba don hajan ka wah.
