Shillong, Jymmang, 14: U nongïalam ka United Democratic Party (UDP) Bah Titostawell Chyne uba long ruh u Nongïalam ka Liang Pyrshah ha Khasi Hills Autonomous District Council (KHADC) ula ong ba ka UDP kam pat shim rai la kan ïashim ne kam ïashim bynta ha ka All Party Committee on Railway ba la thung da ka Sorkar ka ban sa long ha ka taiew ban sa wan.
Ha ka jingïakren bad ki lad pathai khubor ha ka sngi Balang u Bah Chyne u la ong lada ka party kan ïashim bynta ha ka jingïalang kan ieng pat halor ka nongrim ba kan pyrshah beit ïa ka lynti Rel katba ka jylla kam pat don ïa ki aiñ kiba pyrkhing ïa ka jingwan rung kyrthep jong ki briew kiba nabar
“Ban don bynta lang ha kano kano ka jingïalang, nga ngeit ka party kan sa pyrkhat shwa ïa kata,” u la ong.
“Hynrei ngin sa rai kum ka party. Ngim lah ban rai tang kum u president ne general secretary marwei ha kaba ïadei bad kane ka mat. La ngin ïa don bynta ne em ha ka jingïalang jong ka All Party Committee ïa kata ngin sa rai lang ha ka jingïalang ka ban long ha ka taiew ban wan,” u la pyntip.
Shuh shuh, u Bah Chyne u la ong ba ka party ka dang bat ïa ka jinglong kaba skhem ban pyrshah ïa ka jingpyntreikam ïa ka projek lynti Rel khlem kano kano ka lad ban peit shwa ïa ka jingwan rung kyrthep ki briew kiba nabar sha ka jylla.
“Kawei na ki nongrim baskhem jong ka UDP ka long ba haduh mynta ka sngi ngi dang pyrshah ïa ka lynti Rel namarba ym pat don kano kano ka lad ban tehlakam ïa ka jingwan rung jong ki briew kiba nabar sha ka jylla Meghalaya. Dei na kata ka daw ba ngi la pyrshah jur ïa ka lynti Rel,”u la pynpaw.
