Shillong, ïaïong, 14: U Superintendent of Police jong ka East Khasi Hills District Bah Vivek Syiem ha ka Lah Sngi u Blei u la pyntip ba haduh mynta ka Embassy of Hungary kaba don ha New Delhi kam pat shimti satia ïa ka metïap jong u Zolt Puskas, u nongshang kai pyrthei na ka ri Hungary uba la khladnoh bad ïa ka metïap jong u la lap na kawei ka jaka ba la khot kyrteng kum ka Ryngku Ksang kaba dang hap hapoh ka shnong Ramdait jong ka thaiñ Shella, East Khasi Hills District.
Ha ka jingïakren bad ki lad pathai khubor, u Superintendent of Police u la ïathuh ba ka Sorkar ka la pyntip ïa kane ka jingjia sha ka Embassy ba kan phah ïa u kyrwoh sha ki bahaiing hasem ba kin wan shimti noh ïa ka met ba la buh ha ka jaka buh metïap ha Civil Hospital, Shillong lane ba shu tep noh ha nongbah Shillong.
Kum ban shu pynkynmaw biang hangne ba u Zolt Puskas u la jah naduh ka 29 tarik, Lber, 2025 bad ka la don ruh ka jingleit ujor sha ki Pulit ha ka 2 tarik u Ïaïong, 2025 bad ïa ka met jong u la lap tad haduh ka 10 tarik, Ïaiong, 2025.
U SP u la kyntu ruh ïa ki nongjngohkai pyrthei kiba wan nabar ri ba kim dei satia ban leh shngaiñ haba ki thmu ban leit kai sha ki lum ki wah haba ki wan sha kane ka jylla namarba kim da tip bha ïa ki jinglong jingman jong ki jaka.
“Kan jin da la bha ba ki nongjngohkai kiba nabar ri kin ïalam lang ïa ki Tour Guide khnang ba kin lait na kino kino ki jingjia kiba sngewsih,” la ong shuh shuh u SP.
