Shillong, K’lyngkot, 17: Ka All India Trade Union Congress (AITUC) ha ka sngi Thohdieng ka la phah da ka jingthoh sha ka Sorkar Jylla ban pynpaw ïa ka jingbym lah pdiang, halor ka jingmynjur ba dang shen jong ka Kynhun Myntri, ïa ka dor bylla sngi kaba thymmai.
Ha ka dorkhas ba la phah sha u Myntri Rangbah ka Jylla u Conrad K. Sangma ïa kaba la soi da u Secretary jong ka AITUC, Meghalaya State Council u Bah R. Thabah, la pynpaw ba kum ka kynhun kam lah satia ban pdiang ïa ka jingpynbna ba dang dang shen ha kaba dei bad ka dor bylla sngi (Minimum Wages) ba la pynbna da ka Sorkar.
“Ha ka jingïalang jong ka Minimum Wages Advisory Board ba la mihkhmat da ki ophisar jong ka Sorkar Jylla ba la khlieh da u Principal Secretary jong ka Sorkar Meghalaya u C. Songate ha ka 6 tarik, Nailar, 2024, la mynjur ba yn pynkiew T.681.00 ïa ki Unskilled, T.749.00 ïa ki Semi-Skilled, T.824.00 ïa ki Skilled bad T.906.00 ïa ki Highly Skilled,” la ong ka dorkhas. “Ka AITUC ka la hun ïa ka jingpynkiew (bainong sngi) ba la kdew haneng da kaba pyrkhat ïa ka jingkiewdor jong ki marbam mardih ha ka jylla ïa kaba ka sngew ba ngin dup lah ban pynbiang bad ka jingpynkiew (ïa ka bainong sngi) ba la mynjur. Hynrei kaba pynlyngngoh ïa ngi ka long ynda la pynmih ïa ka jingpynbna ka pynpaw pat da kawei ka dur ïa kaba ka AITUC kam lah satia ban pdiang ïa ka jingpynbna,” la bynrap ka dorkhas na ka AITUC.
U Bah Thabah u la pyntip ruh ba ka AITUC kaba la shong ïa ka jingïalang ha ka 15 tarik mynta u bnai ka la rai ban thoh sha ka Sorkar ha kaba ïadei bad ka jingpyntreikam ïa ka jingpynkiew bainong sngi kat kumba ladep mynjur, kata, katkum ka rai ba la shim ha ka 6 tarik, Nailar, 2024.
“Ngi kyrmen bad ngi kyrpad ïa ka jingdawa ban pyntreikam noh,” la pynkut ka dorkhas.
