Shillong, Nailur, 09: U Symbud Myntri Rangbah ka jylla uba khmih ïa ka tnat District Council Affairs (DCA) u Bah Prestone Tynsong u la pyntip ba ka Sorkar ka dang khein dang diah shwa ban pyllait ia ka bhah kaba T.60-70 klur sha ka Khasi Hills Autonomous District Council (KHADC).
“Dang shen u CEM ka KHADC u la ïakynduh ïa nga bad mynta ngi dang pynkhreh ban pyllait ïa kita ki jingsiew kaba long kumba 60-70 klur. Ka jingkhein ka dang ïaid bad shen bha ngin sa pyllait noh,” la pyntip u Bah Tynsong ha ka Dorbar Synrai jong ka Iingdorbar Thawaiñ haba jubab ïa ka jingkynnoh jong u MLA ka VPP na Nongkrem Constituency u Bah Ardent u Miller ba ka Sorkar Jylla kam kwah ban pyllait ïa ka bhah jong ka KHADC.
“
Na ka bynta kiwei pat ki ADC, ngi la leh ïa ka. Kumta, nga kwah ban pynshai ba ngin ym don kano kano ka jingbym ïohthiah mynmiet. To ngin ap bad ai ba kan wan ka kaiphod. Kum ki dkhot jong ka Iingdorbar ngi don ka jingkitkhlieh kaba mar katjuh bad ka jingsngewkhia kaba mar katjuh halor ka jinglong jingman kaba ngi la ïohi ïa ki ADC,” u la pynpaw.
