Shillong, K’lyngkot, 11: Ka Khun Hynniewtrep National Awakening Movement (KHNAM) ha ka Sngi Saitjaiñ ka la rai ban buddien da kaba pynsngew sha ka tnat Labour halor ka jingbym pyntreikam da ki tnat treikam ka Sorkar Jylla ïa ka Regular Casual Worker (RCW) Scheme ba la pynbna da ka Sorkar Jylla naduh u snem 1996.
Ha ka jingïakren bad ki lad pathai khubor, u President jong ka KHNAM u Bah Thomas Passah u la ong, “kumba ngi lap, naduh u snem 1996 haduh kane ka khyllipmat kiba bun bha ki tnat treikam kim pyntreikam ïa ka Regular Casual Worker (RCW) Scheme 1996.”
Haba ïathuh ïa ki jingmyntoi jong ka RCW 1996, u Bah Passah u la ong, “kane ka RCW ka wanrah jingmyntoi ïa ki nongtrei Casual bapher bapher. Ki don ki jingïoh shuti, ki don ki shuti kha khun ïa ki kynthei ba ki tnat treikam bapher bapher ka Sorkar ki dei ban ai ïa ki nongtrei.”
“Kaba kham kongsan ka long ba ka RCW 1996 ka ong, lada lait ki kam ha ka Group-D ha kano kano ka tnat, 50 percent ki kam dei ban mang kyrpang ïa ki na ka bynta ki RCW. Hynrei kumba ngi lap, kiba bun na ki tnat treikam ka Sorkar kim pyntreikam satia ïa kane bad kane ka skhim kaba ka Sorkar ka la pynmih naduh u snem 1996 ka long beit tang ka skhim ha ka kot bad kam don ka jingmyntoi,” la ïathuh u President ka KHNAM.
U la ong shuh shuh, “ngin sa thoh ïa kane ka sha ka tnat Labour ba kan bishar bha ïa ki tnat treikam ki bym pat bud ryntih ïa ka RCW Scheme, namarba katkum kane ka skhim ka la batai shai kdar ba kino kino ki nongtrei kiba shu im dor sngi kiba la trei shiphew snem ladei ban ithuh ïa ki ha ka kyrdan RCW khnang ba kan don ka jingmyntoi ïa ki bad ba kan don ka jingshngaiñ ha ka kam jong ki.”
“Ngi kyrmen ba ka Sorkar kan shimkhia ïa kane ka shim ba kan treikam pura khnang ba kan ym don kano kano ka jingduhnong,” la kyntu President ka KHNAM.
Ha kajuh ka por u Bah Passah u la ïaroh ïa ka jingshim rai jong ka Kynhun Myntri ha ka sngi Thohdieng ban kyntiew ïa ka dor bylla sngi hynrei u la pynpaw pat ïa ka jingsngewsih ba watla ka Sorkar ka la pynmih ïa ka rai hynrei ki tnat treikam jong ka sorkar ki shim por ban pyntreikam ïa kane ka rai.
Ka Kynhun Myntri kaba la long ha ka sngi Thohdieng ha Sohra ka la mynjur ban kyntiew ka Mininum Wages ne ka dor bylla sngi T. 645 na ka T. 586 ïa ki ïa ki Highly Skilled, T. 605 na ka T. 530 ïa ki Skilled, T. 565 na ka T. 474 ïa ki Semi-skilled bad T. 525 na ka T. 419 ïa ki Unskilled.
“Ngi sngewdei ban ai khublei ïa ka Sorkar kaba la sngap ïa ka jingtyrwa jong ngi bad ban shah skhor ïa ki jingdonkam jong ki nongbylla sngi ha ki tnat treikam bapher bapher ka Sorkar,” ong u Bah Passah bad bynrap, “wat lada ka tnat Labour ka la pynkiew ïa ka Minimum Wages hynrei ki tnat treikam ka Sorkar kim ju pyntreikam ha ka por kaba dei.”
“Da lade hi ngi la leit mih sha ka tnat Labour ha ki por kiba la leit ban ïakren halor ka jingbym pyntreikam ïa ka Minimum Wages Rate na ka por sha ka por. Ngi khmihlynti ba ka Sorkar kan bthah lyngba ka tnat Labour ïa ki tnat treikam ka Sorkar ba kin pyntreikam ïa ka Minimum Wages kaba la rai da ka Sorkar khnang ba kan ym don ka jingbanbeiñ ïa ki nongtrei kiba shu trei dor sngi,” u la ong.
“Ngi la shem haba ka Sorkar ka la pynkiew ïa ka Minimum Wages na ka por ka Sorkar ka Arrear kaba ki nongtrei ki dei ban ïoh hynrei kim ju ïoh satia. Haduh mynta ruh ngi la ïoh ujor ba ki don ki tnat treikam ka Sorkar kiba ka Arrear kaba ki nongtrei ki dei ban ïoh kim pat ïoh satia haduh mynta,” ula ong bad ïathuh ruh ba ka KHNAM ka la thoh sha ka tnat Labour bad ngi khmihlynti ruh ba ka tnat Labour kan leh eiei ïa ki tnat treikam ka Sorkar kiba ïa ki kyndon bad ïa ki aiñ na ka por sha ka por.
