Shillong, Naiwieng, 20: Ka jingpynkhreh na ka bynta ban pyni nam ia ka jngriew spah jong ka riti dustur bad ka kolshor jong ka Bri u Hyniewtrep ka Khasi Hills Autonomous District Council ha kane ka kynti ka la pynbna ba kan sa pynlong ia ka Monolith Festival ha ka shnong Mawphlang, East Khasi Hills District.
Mynta ka jingpynkhreh ban shna bad ban maramot ia ki iing trep jong ki Hima bapher bapher ka la nang iaid shaid shaid ha Heritage Village kaba don ha Mawphlang.
Halor kane ka jingthmu jong ka District Council, u Chief Executive Member (CEM) jong ka Khasi Hills Autonomous District Council (KHADC) Bah Pyniaid Sing Syiem ryngkat ka jingsynran lang jong u Chairman ka Ingdorbar Thawain ka District Council u Bah Lamphrang Blah bad u Executive Member ba peit ia ka tnad Larirti u Bah Victor Rani lem bad ki ophisar bad ki bor pyniaid ka Hima Mawphlang ha ka lah sngi U Blei ki la leit ban jurip ia ka jingpynkhreh ban pynlong ia kane ka tamasa.
Ha ka jingjurip, la sakhi ba ka jingmaramot ia ki iing trep jong ki Hima bapher bapher ka dang iaid shaid namarba ki don ki iing trep kiba la sdang ban sator bad ban pra.
La sakhi ia ka jingtap thymmai da u tynriew, ki phlang ban shna pynitynnad bad ka jingker da ki siej ia kaba la shna pynwan dur bha khnang ba kin khring bha ia ki nongwan jngoh kai pyrthei ki ban sa wan sakhi ha ka Monolith Festival ka ban sa long la kumno kumno ha u bnai Nohprah mynta u snem.
Ha kane ka tamasa yn sa don ruh ka jaka ba kyrpang ia kaba la tip kum ka Children Park khnang ba ki khynnah khunlung kin ioh ban lehkai sngewbha ia kaba yn shna la ka jong na ka bynta ki kynthei bad ki khynnah shynrang.
Ha jingjurip la sakhi ruh ia ka jingwan tuid jong ki nongjngohkai pyrthei nabar jylla sha ha Heritage Village bad la khmihlynti ba ka Komiti kaba peit ia kane ka tamasa kan sa buh tarik ban pynlong ia kane ka tamasa na ka bynta ban pynpaw pyrthei ia ka jingriewspah jong ka kolshor jong u Khasi.
U Bah Pyniaid ha ka jingiakren bad ki lad pathai khubor u la iathuh ba ka jingpynkhreh ia kane ka tamasa ka long naduh kaba maramot ia ki ing trep bad kumjuh ruh ban shna pynitynnat shuh shuh ia ki lynti iaid kjat.
Katkum ka jingiathuh jong u Bah Pyniaid ka Sorkar Jylla lyngba ka tnat Jngohkai Pyrrthei ka la mang pisa T.4 klur ia ka KHADC na ka bynta kane ka tamasa katba ka KHADC kan pynlut pisa nalade kumba 50 lak tyngka eiei.
