Shillong, Nailur 05: U Myntri ka tnat Pule Puthi jong ka sorkar jylla u Rakkam A Sangma u la pynthikna ba ka sorkar ka la wad ïa ki lad ki lynti ha kaba ïadei bad ki jingtyrwa ban pynheh tulop ïa ki nonghikai hadien ba ka sorkar ka la lah ban pynbeit ïa ki jingeh ha kaba ïadei bad ka pisa.
Kane ka jingkren jong u ka la wan hadien ba ka seng Federation of Adhoc School Teachers of Meghalaya (FASTOM) ka la rai dangshen ba kan mih sha surok ban ïakhih pyrshah ïa ka sorkar ba kam lah ban kyntiew tulop ïa ki nonghikai adhoc ha ka jylla.
Haba jubab ïa kane na ka liang jong u Sangma u la ïathuh sha ki lad pathai khubor ha ka sngi Thohdieng ba ka sorkar kam lah ban don ïa ka jingkitkhlieh ban siew ïa ki tulop ïa ki nonghikai ha ki grant-in-aid school.
Katkum ka jingong jong u, ïa kine ki ki skul la pynïaid da ki School Managing Committees (SMCs), kiba long trai ïa ki building bad kiba thung ruh ïa ki nonghikai.
“Na ka liang ka sorkar ka pynbiang tang ïa ka grant-in-aid ban kyrshan ïa ki tulop ki nonghikai, hynrei ki SMC ki hap ban kitkhlieh ban rai halor ki jingpynkhreh ïa ki tulop,” u la ong.
“Lada ka pla tyngka jong ka sorkar ka la lah ban biang ngin sa khmih ha kaba ïadei bad kane ka bynta khamtam ha kaba ïadei bad ka jingtyrwa ban kyntiew tulop ïa ki nonghikai. Kane kadei ka jingdawa jong baroh ki kyrdan jong ki nonghikai ha baroh kawei ka jylla. Lada ngi rai na ka bynta ki adhoc, ki nonghikai SSA ruh ki don kumba 14,000 ne 15,000, kumta kam long kaba lah ban rai tang shi synrai naba ka pisa jong ka sorkar ruh ka duna bha,” bynrap u Sangma.
Haba kyrpad ïa ka FASTOM ba kam dei ban ïaid shakhmat ha kaba ïadei bad ki jingïakhih jong ki u Myntri u la ong, “Namar ba ka sorkar ka la wad ïa ki lad ki lynti ban kyrshan ïa ki sngewbha sngap lem ïa kine ki jingtyrwa jong ka sorkar.”
